Innarluutillip angutaa oqallitsitsissaaq

Innarluutillit assigiinngisinneqassanngillat. Taamaattoqarporli, Poul Erik Christensen isumaqarpoq. Taamaattumik innarluutillit pillugit oqallinnissaq aningaasaliiffigaa

Sisimiuni innarluutillit atugaat ersarissumik sammineqalersimapput, qanittukkullu innarluutillit atugarisaat pillugit oqallinnissami innarluutillit sammineqaqqissapput. Ass: Leiff Josefsen

2007-imi upernaakkut taamanikkut Sisimiut Kommuneata innarluutilinnut kajumissaarutigaa politikerinut piumasaqaateqaqqulugit inuunermillu qinngaqqunnanngitsumik piumasaqaqqullugit.

- Innarluutillit periarfissaqassapput namminneq aalajangeeqataanissaminnut innarluutilittut inigisartik qanoq ittuussanersoq, imaluunniit atuisartunut siunnersuisoqatigiinni pisortanut illutaannut isaarissat qanoq ittuunissaannik sunniuteqaqataallutik, taamanikkut Isumaginninnermut ataatsimiititaliami siulittaasoq Alfred Olsen nassuiaavoq, ataatsimut innarluutilinnut politikkimut, kommunit aaqqissuuteqqinneranni immikkoortoq siullertut Maniitsumik isumaqatigiissutigineqartumut, atatillugu.

Tamatuma kingorna Sisimiuni innarluutillit atugaat ersarissumik sammineqalerput, innarluutillillu atugarisaat pillugit qanittukkut oqallinnissami innarluutillit oqaluuserineqaqqissapput.

Oqallinnissamut innarluutilinnik tamanik qaaqqusisuuvoq Ritap angutaa, qarmaaoq SSP Langrendimilu siulittaasoq Poul Erik Christensen. Ritap 2008-mi upernaakkut USA-mi ilinniagaqarnermini qitini napivaa.

Siullermeersuunngilaq Poul Erik Christensenip innarluutillit atugarisaannik sammisitsiniarnera. Taanna pissutaalluni pisortat illuutaannut tamanut innarluutillit isersinnaanerannut pissutsit annertuumik misissuiffigineqarput isumasioqatigiissutigineqarlutillu. Tassani peqataasut, ilaatigut borgmester Hermann Berthelsenip, kørestolerluni qanoq ajornakusoortiginersoq misigaat.

- Oqallinnermik aaqqissuussineq tamatumuuna Tina Dam Rasmussenimit, MIPI-meersumit, meeqqat inuusuttullu pillugit ilisimasaqarfimmit, malinnaaffigineqassaaq, Poul Erik Christensen oqarpoq.

- Kikkunnut tamanut iserneq akeqanngilaq, sallersaatillugilli innarluutillit, Poul Erik Christensen oqarpoq taassumalu aningaasartuutit nammineq aikilissavai.

Piffissami sivikitsumi sammisassarpassuit

Ataatsimiinnissami akunnernik marlunnik sivisussuseqartussami neriuutigaa sammisassat makkua ilaatigut angumerineqassasut: Siunnersuineq, ineqarnermut tunngasut, pisiniarfiit, atuarfimmi ilinniagaqarneq, sungiusarnissamut periarfissat, timersorneq, inuit innarluutilinnik isiginninnerat, illoqarfiup pilersaarusiornera aningaasaqarnerlu. Piffissaqassappallu Poul Erik Christensen ilanngussimavaa "tamalaat".

Ritap angutaa Sisimiuni pissutsinut isorisassarpassuaqarpoq, atuarfiit atuartitsinerlu, innarluutillit aningaasaqarnerat, illoqarfiup qeqqa illorfiullu pilersaarusiorneqarnera. Illoqarfiup pilersaarusiorneqarnera, pingaartumik Pisiffiup eqqaani biilinut inissiisarfik, amerlaqisut isumaqarfigisaat kiisami iluarsisimasoq, pillugu ilaatigut oqarpoq:

- Inuunermut navianaqaaq! Innarluutilinnut kørestolertunut ammukariaq biilit saarpiaannut pivoq. Apeqqutaaginnarpoq qaqugu ajutoortoqassanersoq.

Poul Erik Christensenip siunnersuutigaa Pisiffiup majuartarfiiniit avannamut anisarfiat pisuinnaat ikaartarfiannik Kaaleeqqap Aqqutaanut innarluutilinnut pisuinnarnullu tallineqassasoq.

- Taavalu Kaaleeqqap Aqqutaata kangiani pisuinnarnut aqqusinniortoqartariaqarpoq, taanna isumaqarpoq.

PAASISSUTISSAT:

Suna: Innarluutillit pillugit oqallinneq

Sumi: Taseralik

Qaqugu: 31. januar nalunaaqutaq 10.00-12.00

Powered by Labrador CMS