Inuusuttuaraq persuttaasimasutut unnerluutigineqartoq
15-inik ukiulik tigusarineqarpoq ikinngutiminillu aallaannissimasutut unnerluutigineqarluni
Angut inuusuttuaraq 15-inik ukiulik ippassaq unnukkut tigusarineqarpoq ikinngutiminillu 15-inik ukiulimmik taliatigut aallaannissimasutut unnerluutigineqarluni. Ikinngutaa ippassaq unnukkut napparsimavimmi sinitsinneqarami paasiniaavigineqarsinnaasimanngilaq. Inuunera ulorianartorsiunngilaq, taamaallaallu attoqillaannarneqarsimalluni, taamatut ilisimatitsivoq pisortaq, politikommissær Pavia Kleist.
Tigusarineqartoq nammineq nal. 16.50 politiinut sianerluni oqaluttuarpoq ikinngutini talimigut aallaaneqarsimasoq.
15-inik ukiuliup ikinngutini aallaasimavaa qoorortuumik aallaasimavaa qeqertaasami Qernertunnguit tunuanni Qasigiannguit qeqertaasa tungaanni. Ataasiarluni igeriarsimavoq.
Nalunaarneq pimmat politiit aamma ambulancit ornigupput ajutoorfillu matuneqarpoq ilisimaneqanngimmat susoqarsimanersoq.
Tigusarineqartoq ippassaq unnukkut aallaannissimaneq, nammineq nassuerutigisani, pillugu apersorneqarpoq soorlu aamma allat arlaqartut tamanna pillugu apersorneqartut.
- Arlalinnik paasiniagassanik qanorlu pisoqarsimasinnaaneranik eqqarsaateqarpugut, kisianni suli ilisimanngilarput sunarpiaq pissutigalugu angut inuusuttuaraq aallaannissimanersoq. Utaqqisariaqarparput ajutoortup sinitsinneqarnerminit iternissaa pisup alianartup patsisaata suusinnaanerata paasisaqarfiginissaanut, Pavia Kleist oqarpoq.