Innarluut takuneqarsinnaanngitsoq
Meerarpassuit tarnimikkut ajornartarsiuteqarput takuneqarsinnaanngitsunik
Siumut sinnerlugu inatsisartuni ilaasortaq Karl Lyberth, Naalakkersuisunut apeqquteqaateqarpoq meeqqat takuneqarsinnaanngitsumik innarluutillit (soolu ADHD-imik nappaatillit) qanoq iliornikkut atuarneranni aamma atuareerneranni illoqarfiini aamma nunaqarfiini malinnaaffigineraat.
Apeqquteqaateqarnerminut tunngavigaa Karl Lyberth isumaqarama pingaaruteqarluinnartuusoq Namminersorlutik Oqartussat innuttaaqataasunit taakkuninnga ulluinnarni qanoq atugaqartinneqarnerannik malinnaaffiginninnissaat.
- Qularinngilara Nunatsinni amerlanerussuteqartut ilisimasaqarfigigaat meerarpassuit akornatsinniittut takuneqarsinnaanngitsunik tarnimikkut nappaateqarnerat, kisianni ilisimanngisarput tassaavoq meeqqat taakku illoqarfimminni aamma nunaqarfimminni qanoq atugaqartitaanerat, Karl Lyberth apeqquteqaatiminut tunngavilersuilluni allappoq.
Aammattaaq paaserusuppaa sinerissami meeqqanut taakkununnga atugassaqartitaanerit qanoq assigiinngissuteqartiginerat.
- Atuartitaanerat qanoq ingerlava aamma atuareernermik kingorna isumassorneqarnerat sunaava? Karl Lyberth aperivoq.
- Ilisimavara innarluutilinnik isumaginninneq kommuninit tiguneqarsimasoq, taamaattorli isumaqarpunga pingaaruteqarluinnartuusoq Namminersorlutik Oqartussat, innuttaaqataasunit taakkuninnga ulluinnarni qanoq atugaqartinneqarnerannik malinnaaffiginninnissaat, erseqqissaavoq.