Arctic

Ilaqutariit aamma kisimiillutik pilersuisut 40 missaanniittut juullilernerani Arctic Fondenimut Qaqortumi aningaasanik ikioqqullutik qinnuteqarput. Qinnuteqartut sisamat checkimik 2000 koruuninik tunissuteqarfigineqarput, ilaqutariillu Brugsenimiit 2000 koruuninik tunissuteqarfigineqarlutik, kiisalu aningaasaateqarfimmit pilersinneqaqqammersumit, »julefonden«-imik taagusinneqapallattumik, checki 2000 koruuninik nalilik tunissutigineqarluni.

Aningaasaateqarfimmik pilersitsisoq, Jim Riis, pisortaq Arctic Cafémik aamma Hotel Qaqortumik piginneqataasoq nuannaaqaaq aningaasaateqarfik amerlasuunit ilassilluarneqarmat.

Pissakinnerit ikiorserneqarnissamik annertuumik pisariaqartitsipput

- Uanga sivisuumik eqqarsaatigisimavara kisimiillutik pilersugallit ikiorserusullugit, ilisimagakkumi juullilernerani aningaasatigut artorsartartut. Inunnik qinnuteqartoqarsinnaanera saqqummiupparput, kisianni taamak amerlatigisunik qinnuteqartoqarnera tupaallaatigaara. Tamatuma takutippaa inuiaqatigiinni pissakinnerit ikiorserneqarnissaminnik annertuumik pisariaqartitsisut, Jim Riis oqarpoq.

- Allakkat atuarnerisigut paasisaqarfigaara kisimiillutik pilersuisut aningaasatigut qanoq inissisimanerat. Pisortanit naammattumik ikiorserneqartanngillat. Ingammi juullilernerani eqqorneqartarput, tassami juullimut tunissutissanik, mamakujuttunik juullisunnitsunik imaluunniit orpiliamik pisinissaminnut akissaqanngillat, oqarpoq.

Jim Riis piumassuseqarnerulerpoq tullianilu juullernissaanut ilaqutariit amerlanerusut ikiorserusuppai. Juullimimi 2010-mi ikiorsiinerata paasinarsisippaa tamanna kuseriarnerinnannguusoq.

- Allanik ikiuilluni soorlu ileqqorissaarnikkut ilorfaallalluni. Ikiuinerup iluaqutaanera takuneqarsinnaavoq amerlasuut qujapput. Ikiorneqartuinnaanngitsut kisianni aamma inuit aqqusinermi naapitaat. Nammineq iliuuseqarnerup nersorneqarnerata tamaat akilerpaalusooq, oqarpoq suliffeqarfiillu allat mikinerusut taamatut iliuuseqarnissaannik inassuteqarfigalugit.

- Suliffeqarfiit amerlanerujussuit assinganik ilioraluarpata tamanna annertuumik kinguneqassaaq. Inuttut nammineq peqataanerup sarfaq illua'tungaanut saatsissavaa, kiisalu amerlasuut annikitsugaluamik pitsaasumilli iliorunik, taava tamanna pitsassuanngussaaq, oqarpoq.

Aningaasat sumut atorneqarsimanerat Jim Riisip ilisimanngilaa, kisianni naatsorsuutigaa atorneqarfissaminut atorneqarsimassasut tassa juullimut tunngasunut nuannaarutissanut.

- Tamanna uanga akuleruffiginngilara. Inuit namminneq aalajangissavaat aningaasat sumut atussanerlugit, kiffaanngissuseqarput akisussaaffeqarnerup iluani, oqarpoq.

Qaqortumi aviisimi »Kujataamiu«-mi qinnuteqartunut qujassuteqarluni allakkamini Jim Riisip qularnaarpaa, qinnuteqaateqartut tamarmik isertugaqarsinnaaneq taamaat tunngavigalugu iliorneqartut kisalu allakkat tiguneqartut tamarmik makitsinerup kingorna aserorterneqarsimasut.

- Qinnuteqartut akornann 18-it aningaasatigut ikiorserneqarsinnaasutut akuersissutigaavut. Kukkunersiuisoq arlaanaannut attuumassuteqanngitsoq makitsisuuvoq, aamma allakkat aserorterneqarneranni isiginnaartuuvoq. Juullinnginnerani isumagaarput inuit qinnuteqaammik immersuisinnaanerat, oqaluttuarpoq.

Maannakkut Julefonde kontumik pilersitsivoq, tulliani juullernissaanut aningaasanik amerlanerusunik katersaqarniarlutik taamaalillutillu checkinik amerlanerusunik tunissuteqarlutik. Taamanikkornissaanut Narsami innuttaasut aammattaaq aningasanik ikiorserneqarnissaminnut qinnuteqarsinnaanermut periarfissaqassapput, Jim Riis ilisimatitsivoq.