Air Greenland periarfissaagallartillugu iliuuseqanngilaq
Ilimanarluinnarpoq Air Greenlandimi sinikataartoqarsimasoq, siorna upernaakkut Namminersorlutik Oqartussat angalanermut aningaasartuutit appartinniarlugit isumaqatigiinninniarnitik aallartimmatigik
Namminersorlutik Oqartussat aamma Air Greenlandip akornanni allaqatigiittarsimanerni Radioaviisip qinnuteqarnermigut atuarsimasaanni, taakkunani atuarneqarsinnaavoq suliffeqarfik namminersorlutik oqartussanit piginneqataaffiusoq annertuumik atuisutut akikillisaafigineqarnissamut tungatillugu ukiap ingerlanerani uterfiginneqqinniartoq.
Kisianni taamatut pisoqarianngitsoq Namminersorlutik Oqartussat sivisuumik Air Icelandimut isumaqatigiinninniareerlutik, novembarip 24-ani 2010 isumaqatigiissummik atsioqatigiipput.
Namminersorlutimmi Oqartussat siullermik Air Greenland aamma Air Iceland apriili 2010-mi attaveqarfigaat bilitsinut allanngortinneqarsinnaanngitsunut tunngatillugu angalanerni allanngortinneqarsinnaasunngorlugit akikillisaaffigineqarsinnaanermut periarfissaqarnersoq tusarniaaffigalugit.
KNR-imit paasissutissat pissarsiarineqartut tunngavigalugit Air Greenlandimi tuniniaanermut pisortaq, Klaus Johansen kingusinaalaarluni akissuteqarsimasoq, tamannalumi pillugu 26. maaji 2010 utoqatserpoq.
Ilaatigut allappoq Air Greenlandimit kissaatigineqanngitsoq namminneq bilitsit akikinnerpaat tuniniartakkatit, tassa bilitsit aappalaartut allanngortinneqarsinnaanngitsullu allanngortissinnaasunngorlugit iluarsiiffiginissat kissaatiginngikkitsit.
- Tamatumani annilaangassutigaa timmisartuutileqatigiiffiup niuernermik ingerlatsinerata mangiarneqarnissaa, KNR-imi saqqummiunneqarpoq.