Sakkutuut timmisartortartut sakkutuut imarsiortut Issittumi sulineranni ikiuupput
Ukiut nikinneranni sakkutuut imarsiortut helikopterii sakkutuunut timmisartortartunut nuupput, tamatumunnga pissutaavoq forsvarsforligit 2010 - 2014 tunngavigalugu Søværnets Helikoptertjeneste aaqqissuussinermut tunngatillugu sakkutooqatigiinniit allanit allanut nuunneqarmat, Kangilinnguani Sakkutooqarfik nittartakkamini allappoq.
Januaari 2011 aallarnerfigalugu Sakkutuut Imarsiortut Helikopterertartui nutaamik taaguuteqalerput Eskadrille 723-imik. Taamaattumik maannakkut sakkutuut helikopterii tamarmik aaqqissuussaanermi Helicopter Wing Karupimut atalerput, taamaalilluni sakkutooqatigiit tamarmik helikopterit atorlugit suliassaat tassunga atalerput, Kangilinnguani Sakkutooqarfik nittartakkamini ilisimatitsivoq.
Suliassat ilagaat sakkutuut imarsiortut umiarsuasa Atlantikup avannaani aamma Issittumi angalasut kiffartuunneqartarnissaat. Suliassat sakkutuut helikopteriinut Luýnxinut nutaajunngitsut. Helikopterit Lynxit danskit sakkutuuini imarsiortuni atorneqaleramilli 1980-imi Kalaalli Nunaata aamma Savalimmiut eqqaanni sakkutuut imarsiortut alapernaarsuutaanni suliassanik naammassinnittarput. Suliassarlu ingerlaqqiinnassaaq - taamaallaalli Eskadrille 723 suliamik ingerlatsisoralugu, Kangilinnguani Sakkutooqarfimmit oqaatigineqarpoq.
Helikopterit Kalallit Nunaanni suliassaat
Kalaallit Nunaanni sakkutuut alapernaarsuutaanni helikoptereqartarnera akuttunngitsutigut suliassat naammassineqarnissaannut tunngaviulluinnartarput.
Suliat tamakku ilagaat nalinginnaasumik oqartussaassuseqarmik takutitsinermiit aalisarnermik nakkutilliinermut, umiarsuarnik allanik ikiuinermut, tamaani innuttaasunik ikiuinermut, napparsimasunik angallassinermut, sikunik alapernaarsuinermut aamattaaq minnerunngitsumik ujaasinernut aamma annaassiniarnernut.
Suliassat tamakkuttaaq sakkutuunit timmisartortartunik tiguneqarput sakkutuut imarsiortut helikopteriannik tigusinermut atatillugu.
Taamaattumik januaari 2011 nutaanik kinguneqanngilaq. Sakkutuut suli Kalaallit Nunaata aamma Savalimmiut imartaanni suliassat assut pingaaruteqartut suliaraa, kisianni maannakkut sakkutooqatigiit atisaasa qalipaataat qorsuit, tungujortut taartut aamma tungujortut qaamasut sakkutuut imarsiortut umiarsuaanni qasertumik qalipaateqartuni ataatsimoortinneqaannarlutik, Kangilinnguani Sakkutooqarfiup nittartagaani tamanna paasinarsivoq.
Sumiiffiit peqqarniitsut
Kisianni suliaq sumiiffinni sakkortuuni aamma tikikkuminaaqisuni eqqarsaatigineqanngingajassinnaasuni ingerlanneqartarpoq. Kalaallit Nunaat aamma Savalimmiut pinningaasseqarsinnaallutillu sila naakkittaatsorsuusarpoq. Tamanna imarsiortut aamma helikopterini inuttat amerlasuut uppernarsarsinnaavaat, tassami ullup ingerlanerani nerisat iserfimmikkut anillattaleraangata. Taamaattumik taamak naakkitaatsumik avatangiiseqarluni helikopterimik timmisartorneq, tamatumunnga ilanngullugit helikopterip mittarfiata orfaaqisup qaavaniit tingisarnerit aamma qaavanut mittarnerit, imarsiornermut taamatut avatangiiseqartumut paasinilluartuunissaq aamma sungiussinissaq pisariaqarluinnarpoq.
Tamanna sungiussinissaq Eskadrille 723-mut ajornarsimanngilaq, taakkumi aammattaaq ullumikkut helikopterit, timmisartortartut aamma teknikkerit umiarsuarmut alapernaarsuummut Vædderenimut Kalaallit Nunaata eqqaani alapernaarsuisumut - soorlu sorsuutit alapernaarsuutit ukiumut ulluni 365-ini taamaattartut - atugassaritippaa tassani ilaavoq helikopteri, Kangilinnguani Sakkutooqarfik ilisimatitsivoq.
Kangilinnguani Sakkutooqarfimmi susoqarnersoq illit malinnaaffigisinnaavat quppernermi uani: http://forsvaret.dk/GLK/Nyt%20og%20Presse/Pages/Nyt%20og%20Presse.aspx