Qaasuitsup kommunia kommuniuniarpoq nukissiuutinik atuinikitsoq

Unamisitsinerup nutaap takutissavaa Nunani Avannarlerni kommuni sorleq nukissiutinik atuinermini eqqarsaatiginnillaqqinnerpaajunersoq. Qaasuitsup Kommunia unammisitsinermut peqataaniarluni misiliiniarpoq, kommuneqarfik nittartakkami allaaserisaqarpoq.

Nordisk Ministerrådip suliniut "Nordisk Energikommune" aallarneqarpaa.

Nunani avannarlerni suliniuteqarnermi nukissiutit piujuaannartitsinermik tunngaveqartut, avatangiisinut innarliinnginnerit silaannarlu pillugu sulinermut attuumassutillit nukissiuutit qitiutinneqassapput. Nunani avannarlerni kommunit immikkut ittumik nukissiuutit pillugit suliniuteqartut, unammisitsinermi nersorneqassapput.

Qaasuitsup Kommuniata qinnuteqaatimini allaaserivaa suliniut kommunip ingerlassimasaa qimussertarnerup attatiinnarneqarnissaanut tunngasoq. Qimussertarnermut suliniut upernaakkut 2008-mi aallartinneqarpoq, EU-milu suliniut Clim-ATIC aningaasaliisoralugu suliarineqarsimalluni. Qimussertarnermut suliniutip siunertaraa, Qaasuitsup Kommuniani qimussertarneq attatiinnarneqassasoq, avatangiisinut mingutsitsisuunngimmat kulturikkullu kingornussatut angallataammat, tamannalu najugaqarfinni inuussutissarsiutitut Kalaallillu Nunaata avannaani kulturikkut ilisarnaataanera pingaaruteqarmat, kommuneqarfik nittartakkamini allaaserisaqarpoq.

Suliniuteqarnermi Ilulissat eqqaanni qimussit aqqutaasa pitsanngorsarnissaat sammineqarsimavoq. Tamannalu ingerlanneqarpoq suliaqarnerit assigiinngitsut pingasut atorlugit:

* Qimussit aqqutaat illerniuutinik pitsanngorsarneqartarput.

* Qimussit aqqutaasa ilaat geotekstililersorlugit aqqutigissarneqarsimapput aput aapallannaveersaartillugu.

* Qimussit aqqutaanni aputeqarnerunissaa eqqarsaatigalugu oqquarfilerneqarsimapput. Tamatumalu saniatigut sumiiffimmi qimussertarnerup silaannaq pillugu naleqqussarnissamik pilersaarut suliarineqarsimalluni.

Siullermik nunani avannarlerni namminersortunilu tamani kommunit pingasut tikillugit amerlassusillit piukkunnaatilittut toqqarneqassapput, Qaasuitsullu Kommunia tamatumani piukkunaatilittut toqqarneqarnissaminut neriuppoq.

Tamatumalu kingorna upernaakkut 2011-mi – 2011-mi Nordisk Energikommunitut – ajugaasoq toqqarneqassaaq. Kommunit piukkunnaatillit ajugaasullu Nordisk Energikommunip ilisarnaataa imminnut avammut nittarsaannerminni atornissaannut periarfissaqassapput.

Kommunip nukissiuutinik atuinerata CO2-millu aniatitsinerata ersersinnissaanut millisinnissaanullu Qaasuitsup Kommunia aningaasanik amerlanerusunik immikkoortitsisoq, kommuneqarfik paasissutissiiavoq.