Nive Nielsen tusarnaartitsisaqattaarialerpoq
Nive Nielsen upernaaq manna ulapittussaavoq Skandinaviami, Englandimi, USA-mi aamma Canadami tusarnaartitsisassalluni.
Ukiuunerani Nivimut taamaatilerpoq... Immiussilluni nutaanik suliaqarpoq, upernaarlu ulapaarfiussaaq ilaatigut Skandinaviami, UK-mi, USA-mi aamma Canadami tusarnaartitsisassalluni.
Kisianni siullermik Nunatsinni marloriarluni tusarnaartitsisussaavoq. Nive Nielsenip & The Deer Childrenillu Nunatsinni tusarnaariarnissaannut takunissaannullu piffissami sivisuumi periarfissaq kingulleq.
Nive Nielsen & The Deer Children Simon Lyngelu Qaqortumi februaarip ulluisa qulingiluaanni aamma Nuummi Katuami februaarip ulluisa aqqarnanni. Tassa tusarnaartitsinerit nalissaqanngitsut tupaallatsitsisussanillu pulaarteqassaaq immaqalu erinnat nutaat aatsaat tassani tusarnaarneqarsinnaasussat. Taamatut ilisimatitsivoq Nive Nielsenip manageria Jan De Vroede.
Kingornatigut Nive Nielsen & The Deer Children ilaatigut Norgemut angalassapput, tassani nunani avannarlerni festivaleqartitsisarnermi tusaamaneqarnerpaat ilaanni Oslomi Larmimi (17/18/19. februar) arlaleriarlutik tusarnaartitsissallutik. Kingornatigut Danmarkiliassapput Københavnimi (21/2 Huset i Magstræde) Nivep nuannarilluagaa "the godfather of americana" Howe Gelb nipilersoqataassalluni. Billettinngooq nungulereerput.
Qaammatip sinnerani tusarnaartitsisaqattaarlutik angalanerat Englandimi pissaaq, martsimi USA-mut, Jan de Vroede ilisimatitsivoq.