Mimi oqaatsit pillugit Igalunni ataatsimeersuarnermut
Mimi Karlsenip Nunavumut tikeraarnera kinguneqassaaq ilinniartitaanermi aamma kulturikkut suliniutinut tunngatillugu suleqatigiinnermik, taamatut naalakkersuisoqarfimmiit tusagassiuutitigut nalunaaruteqartoqarpoq.
Kultureqarnermut, Ilinniartitaanermut, Ilisimatusarnermut Ilageeqarnermullu naalakkersuisoq Mimi Karlsen ulluni makkunani Nunavumi Iqalunni Language summit 2011-mi peqataavoq, tassani Nunatsinni misilittakkanik ilisimasanillu immersueqataassalluni. Ataatsimeersuarneq ingerlanneqassaaq ulluni 8. - 14. februar 2011, taamatut tusagassiuutitigut Kultureqarnermut, Ilinniartitaanermut, Ilisimatusarnermut Ilageeqarnermullu naalakkersuisoqarfik nalunaaruteqarpoq.
Oqaatsit pillugit ataatsimeersuarnerup saniatigut aamma atorfillit peqatigalugit Iqalunni Pannertuumilu ilinniartitaaneq misilittakkanillu paarlaasseqatigiittarnissaq ilaatigut kulturikkut tunngaveqartumik ilinniartitaanernik, ilikkagaqarniarnernik naliliisarnernik ilinniartitaanermilu aaqqissuusseqqinneq pillugu isumasioqatigiinnermi peqataassaaq. Nunavumi ilinniartitsinermi utoqqarnik akuliutsitsisarneq ilinniartitaanernik aaqqissuusseqqinnermik piviusunngortitsinermi misilittakkat nutaajunerpaat Nunatsinnut immikkut soqutiginaateqartut ilaatigut alaatsinaanneqarput, Mimi Karlsen isumaqarpoq.
Ataatsimeersuarnermi isumasioqatigiinnermilu peqataanermi saniatigut naalakkersuisup Mimi Karlsenip naapissavaa Premierminister Eva Aariak, ilinniartitaanermut ministeri Hunter Tootoo kiisalu kultureqarnermut, oqaatsinut, utoqqarnut aamma inuusuttunut ministeri James Arreak, Pannertuumi aamma Iqalunni borgmesterit kiisalu meeqqat atuarfiinut, gymnasianut, meeqqerivinnut il.il. aamma pulaartussaalluni, taamatut allassimavoq tusagassiuutitigut nalunaarummi.
Nunavumik suleqateqarnissamik naalakkersuisup nukittorsarneqarnissaa soqutigisaraa. Taamaattumik Mimi Karlsenip tikeraarnerata kingunerissavaa ilinniartitaanermi kiisalu kulturikkut aaqqissuussinertigut suleqatigiinnissamut isumaqatigiissuteqarneq.