Unammilleqatigiinnermi illoqarfiit mikinerusut eqqugaassapput
Soorlu assersuutigalugu Air Greenlandip angallavimmi Nuummit Kangerlussuarmut unammilleqatigiinneq pissutigalugu bilitsit akii appartippagit, taava tamatuma kingunerisinnaavaa angallavinni aningaasannanniutaasuni bilitsit akiisa qaffannerat, aamma imaluunniit angalasarnerit ikilinerat Jens B. Frederiksen oqarpoq
Sapaatit akunneri arlaqanngitsut qaangiuttut tamanut saqqummiunneqarpoq Namminersorlutik Oqartussat pisiniarnermut immikkoortortaqarfia Air Icelandimit pisarsartutut angisuutut isumaqatigiissuteqartoq, tamatumalu kingunerisinnaavaa nunami maani angallaviit ilaasukinneruffiusut akitsornerat, tamannalu tunngavigalugu Inatsisartuni ilaasortap Malik Berthelsenip, Siumut, naalakkersuisunut apeqquteqaatigaa Air Greenlandip timmisartorfinni imminut akilersinnaanngitsunik aningaasartuutini sullissinissamut isumaqatigiissut aqqutigalugu matusssertissanerai.
Tamatumunnga tunngatillugu naalakkersuisuni ilaasortaq Jens B. Frederiksen akissuteqarpoq Namminersorlutik Oqartussat aamma Air Greenland 2006-imi angallavinnut assigiinngitsunut tunngatillugu sullissinissamik isumaqatigiissuteqarsimasut, tamatumani pineqarlutik imminut akilersinnaasumik ingerlatsiviusinnaanngitsut.
Isumaqatigiissutit 2012-ip tungaanut ingerlapput. Piffissami tassani Namminersorlutik Oqartussat Air Greenlandimut isumaqatigiissut tunngavigalugu ukiumut 100,9 mio. koruunit akilertarpai. Aningaasat amerlassusiat aqqutinik pineqartunik ingerlatsinermi aningaasartuutit tunngavigalugit aalajangerneqarpoq, taamaaliornikkut isumaqatigiissutip aningaasartaasa katillugit aamma bilitsinik tunisinermi isertitat tunngavigalugit angallavinni isumaqatigiissummut ilaatinneqartuni ingerlatsineq imminut nammassinaasunngortippaa.
- Ukiumut isumaqatigiissutip aningaasartai ukiuni arlalinni atuuttussatut siumut aalajangerneqareerput, kiisalu sullissinissamut isumaqatigiissummut ilaatinneqanngilaq amigartooruteqarnissamut qulakkeerineq. Tamanna imatut paasineqassaaq angallavik sullissinissamut isumaqatigiissummut ilaatinneqartoq amigartooruteqarfiuppat tamanna pissutigalugu Air Greenland aningaasanik pisassaqanngilaq, Jens B. Frederisken nassuiaavoq ilisimatitsissutigalugulu, angallaviit sullissinissamut isumaqatigiissummut ilaatinneqartut taamaallaat ukiumut ataasiarlutik iluarsiivigineqarsinnaasut akit qaffakkiartortarnerat tunngavigalugu.
- Taamatuttaaq allanngortitsinissamut periarfissat killilersorneqarput. Tassa imaappoq Air Greenlandip bilitsit akiinik qanoq annertutigisumik qaffaasinnaanera imaluunniit angallavinni sullinnissamut isumaqatigiissummut ilaatinneqartuni qanoq annkillilerisinnaassuseqarnera sakkortuumik killilersorneqarpoq, Jens B. Frederiksen oqarpoq.
Angallaviit iluanaarniutaasut
Soorunami Air Greenland aammattaa angallavinnik iluanaarniutaasunik ingerlataqarpoq taakku nalinginnaasumik illoqarfiit akornanni ingerlaviupput. Tamatumani suliffeqarfiup nammineq aalajangertarpaa bilitsinut akigitinneqartut aamma aallarnissat amerlassusiat, ilisimatitsivoq.
- Taamaattorli angallaviit iluanaarniutaasut qanoq imminnut akilersinnaassuseqartiginera assigiinngiiaartorujussuuvoq. Nalinginnaasumik angalaviit imminnut akilersinnaanerusut angallavinnut akilersinnaanerunngitsunut tapertaasarput. Tamanna imatut paasineqassaaq soorlu assersuutigalugu unammilleqatigiinnerup annertusineranik pissuteqartumik Air Greenlandip Nuummit Kangerlussuarmut bilitsinik appaappat, taava tamatuma kingunerisinnaavaa angallavinni iluarnaarniarfiusuni allani bilitsit akiisa qaffaannerat aamma imaluunniit aallartarnerit ikilineqarnerat.