Sooq aalakoortarpugut
Malik Berthelsenip imigassartoriaaserput misissuiffigitinniarpaa
Naak imigassamik eqqussuineq 80-ikkunniilli appariarujussuaraluartoq suli inuiaqatgiinni annertuumik imigassamik ajornartorsiuteqarpugut. Maannakkullu Inatsisartuni ilaasortap Malik Bethelsenip, Siumumeersup, tamanna sumik pissuteqarnersoq misissuiffigitinniarpaa.
Taamaattumik apeqquteqaatigaa Naalakkersuisut misissuiffigitilersaarneraat uagut imigassamik atuinermut inuiannut allanut sanilliullugu allaanerussuteqarnersoq, sunalu assigiinngissutaanersoq taamaattoqarsimappat, sunalu tamatumunnga patsissaanersoq.
Apeqquteqaatini tunngavilersorpaa aalakoornartulinni eqqussuineq 1980-ikkunnut sanilliussilluni affaannanngorsimasoq, Taamaakkaluartorli ajornartorsiutit imigassamik tunngaveqartut tamatuminnga pissuteqartumik annikilleriarsimanatik.
- Naak aalakoornartortalinnik eqqussuinerput annikillisikkaluarlutigu, taamaattoq uteqqiattuartumik pisartunik ajornartorsiuteqarpugut, oqarpoq.
- Tusagassiutitigut tusartuarparput politiinit nalunaarutit alianartut angerlarsimaffinni eqqissiviilliornerit kinguaassiutitigut atornerluinerit aamma toqutsinerit, tamakkulu aammattaaq akuttunngitsumik ilaqutaariinni meerartalinni misigineqartarlutik. PIssutsit taamaattut nunarsuarmi tusagassiorfitsigut Nunarput tusaamanerlunneqartippaat sumiiffittut pissutsini taamaattuni nunarsuarmi rekoortiliiffittut.
- Uagut Nunatsinni naassaanngitsumik ajornartorsiutit tamakku ingerlatiinnarsinnaannginnatsigit isumaqarpunga, uagut politikikkut sulinitsinni atortussanik allanik nassaarniartariaqartugut. Atortut ilaat tassaasinnaavoq ilisimatusarneq tunngavigalugu imigassamik atuisarnitta inuiannut allanut sanilliullugu misissuiffigneqarnissaa. Naggueqartigut tamatumunnga assingusumik ajornartorsiuteqarmata, taamatut misissuititsineq suleqatigiiffiusinnaappat pitsaassagaluarpoq, Malik Berthelsen isumaqarpoq.
- Ukiorpassuarni imigassamik ajornartorsiuteqarnerput politikikkut oqallisaasimaqaaq, kisianni ajoraluartumik ajornartorsiutit annertussusiat taamaaginnarpoq. Taamaattumik uanga isumaqarpunga maannakkut piffissanngortoq ajornartorsiutinut tamakkununnga suna tunngaviunersoq paasissallugu. Politikikkummi anguniakkat amerlasuut piviusunngortittarpavut, kisianni misiginarpoq imigassamik ajornartorsiuteqarneq taassa tassaasoq iluatsissallugu sapernarnerpaaq.