Nuummi biilit arlallit ataatsikkut aportut
Nuummi anorersuarnerani biilit sisamat ataatsikkut aporput
Nuummi Politiit tallimanngormat nalunaaqutaq 13 tulleriiaaginnarnik sianerfigitipput Eqalugalinnguani Qernertunnguanut kajallaasarfik tikinngilaarnerani biilit ataatsikkut arlaqartut aporsimasut.
Politiit suli paasiniarpaat qanoq pisoqarsimanera maannakkullu oqaatigisinnaanngilaat sooq taamatut ataatsikkut aportoqarsimanersoq.
- Ajutoornermik takunnissimasunik suli apersuivugut. Suli ilisimanngilarput biilertut ilaat sukkavallaamik ingerlasimanersut, imaluunniit allamik pisoqarsimaneratigut ataatsikkut apornerat pisimassanersoq. Inuk ataaseq ajoquserpoq, qanorli ajoqusertigisimanersoq maannakkut oqaatigisinnaanngikkallarpara, taanna maannakkut Dronning Ingridip Napparsimavissuani suli passunneqarmat, Nuummi Politiit pigaartuat, Kasper Berthelsen oqarpoq.
Unnuaq tamaat Nuummi persertorsuuvoq tallimanngornerlu tamaat anori 20-25 m/s sakkortussuseqarluni, politiillu biilertut silap qanoq innera eqqarsaatigalugu biileqquaat.
- Isikkiviluttorujussuuvoq, aqqusernillu quaasallutik. Sila taamaatsillugu biilertut taamaattumik kajumissaarpagut arriitsumik mianersortumillu biileqqullugit, Kasper Berthelsen oqarpoq.
Ajoquserneq politiit misissuiffigereerpassuk biilertut ajutoortut eqqartuussisutigut iliuuseqarfigineqassanersut isummerfigineqassaaq.