Kalaallit Nunaanni ufo-t pillugit toqqortat ammalaarlugit

Atuagassiaq Ufo-Nyt saqqummertarunnaarpoq. Normumi kingullerpaami Pituffimmi takusimasat eqqumiitsut qitiutinneqarlutik aamma Ammassalimmi politiit, ufo-mik assiliisut qitiutinneqarlutik sammineqarput.

Una ulloriaava, puugutaasaq timmisoq marsip inuinik qorsunnik inuttalik imaluunnit naneruaq pappiaqqamik sanaaq qullariartortoq? Polfoto

- Immaqa upperinavianngilarma Kuluusuup aamma Kuummiut akornanni UFO-mik takusaqarpunga.

Sakkutuut timmisartortartut ufo-t pillugit toqqarsiviatut taaneqartartumi toqqorsivianiittut tamanut saqqummiunneqarmata, toqqortaatini nalunaarutaasimasut ilaat atuagassiap Ufo-Nytip pissarsiarisimassaasa ilaanni tamatut allassimasoqarpoq.

Ufo-nyt danskit atuagassiaraat silaannakkut ingerlasunik suuneri ilisimaneqanngitsunik nalinginnaasumik ufo-nik taasakkatsinnik misissuisarnernut tunngatinneqartoq. Ukiut 15-init saqqummertareerluni maannakkut atuagassiaq atorunnaarpoq.

Tamatumunngali pissutaanngilaq qilammi suunersut ilisimanngisat takuneqartartut ikilisimanerat, kisianni pissutaaginnarpoq atuagassiaq ullutsinni digitalimik ingerlatsinerup nalaani imminut akilersinnaajunnaarnera. Normumi kingullerpaami saqqummersumik Kalaallit Nunaanni aamma Pituffimmi ufo-t takuneqartarsimasut annertuumik sammineqarput.

Oqaluttuat 1980-ikkunninngaanneernerusut sumiffinni politeqarfinneersuunerupput. Nalinginnaasumik unnuakkut inuttaasut sianertarpoq, taavalu politiit oqaluttuat tamakku Kangilinnguani Sakkutooqarfimmut imaluunnit Danmarkimi Forsvarskommandomut (sakkutuut qullersaqarfiat) ingerlateqqittarsimavaat.

Ufo-nytimik oqaluttuat taamaattut aamma inunniit siarngutigineqartarsimasut untrilitikkaat atuarsimavaat. Taamaattorli uppernarsaasersuutit tamakku saqqummiunneqarsimasut kimingaanneernerat ilisarnarunnaarsarneqarsimapput, tassa imaappoq aqqit aamma paasissutissat allat ilisarnarunnaarsarlugit tuschimik titigaapput.

Oqaluttuaq ataaseq allannit allaaneruvoq. Taanna Ammassalimmi politeeqarfimmeersuuvoq, tassani politiit namminneq ufo-mik takusimallutik nalunaarutigaat.

Politeeq siulleq allappoq:

”ALLAKKIAQ – tallimanngorneq oktobarip 21-at 1983, nal. 0200 – 0300 qaamanermik takusaqarneq.

XX XX, angerlarsimalluni pigaartuusup ataani atsiortunga unnuaq taanna nal. 0200 radioaqqakkut aggersarpaanga suaartarluni ’Iih xxxx, upperinavianngilarma, Kulusuup aamma Kuummiut akornanni UFO-mik isiginnaarpunga.’ Taamaatumik piumaffigaara biilerluni aqqusaassagaanga uanga assiliiniassagama, taamaaliorporlumi.

Tamatuma kingorna uanga aamma qaamaneq isiginnaarpara qulaani taaneqareersutut sumiiffimmi tassani, kisianni Kulusummut qaninnerusumi. Qaamaneq annertungaatsiarpoq kiisalu ullorissamit nalinginnaasumit anginerujussuulluni qaammareqalunilu. Nalunaaquttap akunnera ataaseq isiginnaarparput sunngilaq imaluunnit allatut nikerianngilaq tassani uninngaannarpoq, taamaattumik uanga angerlaannarpunga.

Aqaguani tassaniittoq takoqipparput taamaattumik uanga eqqarsarpunga Qaasuitsup Ulloriarissagaa, kisianni ullut pingajussaanni peerussimavoq.

Asseq ersissagassaq ilanngullugu nassiuppara. Arlalinnik assiliivunga kisianni sajuppilussimagamik, taamaattumik ataasinnaaq sajuppilussimanngilaq’, politeeq nalunaarusiamini allappoq.

Asseq ataase aamma ersersagassaq Nuummi Politimestereqarfimmut nassiussaa, tassangaannit assit Kangilinnguani Sakkutooqarfimmut ingerlateqqinneqarput.

Ufo-Nytimit allaaserineqarpoq assilisap assingani imaluunni ersersagassat assinginik imminnut tunniussisoqarsimanngitsoq.

Aappassaanik Pituffiup eqqaani pisoqaqqippoq. Tallimanngorneq 6. februaari 1981 Pituffimmi politeeq sulisoq allappoq:

”Basecommander xx xx, Thule Air Base, 22. JAN 1981 ilisimatippaanga xx. xx. aamma xx-imut pisortaasup sunaanersoq/qaamasoq ullormi tassani radarimikkut takusimallugu, naak uanga ilisimatinneqarsimanngikkaluarlunga, telefonikkut saaffigineqarama taava ingerlaannarlunga xx-imut telefonikkut saaffiginnippunga.

(...)

xx xx Thule Air Base, ataani atsiortunga ullumi una xx xx aqqutigalugu uannut nassuiaatigineqarpoq 5. JAN 1981 nal. 1350 silaannakkut ingerlasoq suunerali ilisimaneqanngitsoq takuneqarsimasoq, ingerlavia tassaalluni allorniusaq 165 sakkutooqarfimmit toqqaannarlugu (allorniusaq 240 qalasersup kajungerisaaniit uuttorlugu).

Ungasissuseraa 15 nautical miles missaanni. Arriitsuararsuarmik ingerlavoq, tassami kangimut ingerlavoq 20-40 knobinik sukkassuseqarluni. Radarimi immikkut ittumit isiginnaarneqarfianit oqaatigiuminaappoq takuneqartup qanoq portutigisumiinnera, kisianni 2.000 aamma 3.000 feet akornanniippoq.

Takuneqartup angissusianut tunngatillugu ilisimatitsissutigineqarpoq radarikkut malunniunnera timmisartup C-14-ip malunniuttarneranut tamaattuusimagaluarpat assingusumik malunniuttoq. Takuneqartoq radarikkut sekundini 20-30-ni malunnarpoq’.

Pisoq assigiinngitsunut ingerlatinneqarpoq kiisalu Karupimi Flyvertaktisk Kommandop aamma Thule Air Basep akornanni arlaleriarluni allagaqartoqartarsimavoq, taakkulu Pituffimmi Politiit peqatigalugit naggataatigut inerniliipput, malugineqartoq tassaasimassasoq helikopteri nakkariartortoq.

Powered by Labrador CMS