Mitaartut Taseralimmi
Sisamanngornermi januaarip arfernani nal. 19.30 periarfissaqarpoq allanik mitaartunik Taseralimi - Sisimiuni kulturip illorsuani - naapitsinissaq.
Kunngit Pingasut Ulluanni Kalaallit Nunaanni mitaarfiusarpoq. Tamanna qangalili ileqquusarpoq, illoqarfinni ataasiakkaani taamaallaat assigiinngissuteqalaartarluni.
Aasianni ukiup naanerani - tassa ukiutoqqami - mitaarneq aallartittarpoq januaarillu arfernani naggaserneqarluni. Ilulissani mitaartut ulorianartorujussuugunarput. Sisimiuni januaarip arfernani mitaartut naapitassaasarput. Mitaarnermi siunertarineqartarpoq ilisaritinnaveersaarluni ilisarisimasanukarnissaq. Mitaartut ilisariniarneqartarput oqalutsinniarsarinerisigut imaluunniit aalajangersimasunik pissusilersortinnerisigut.
Iluamik ilisimaneqarpianngilaq mitaartarneq suminngaanneersuunersoq. 1900-kkut aallartinneranni kiinarpat ammimit sanaat atorneqartarput, taakku atorlugit aalajangersimasumik ileqqulersortoqartarluni. Tamakku ilagaat qitinneq maannakkut suli ileqqulersuutigineqartartoq, ikinngutit, ilaquttat ilisarisimasallu angerlarsimaffiinut ornigulluni qitittarneq. Nateq tukkartorneqartarpoq, soorlu kalattuuni taamaattoqartartoq. Kisianni, immaqa hip-hop ullumikkut aamma atorneqartartoq?
Mitaartarneq soorunalimi aamma allanngoriartorsimavoq. Qanga amerlasuut mitaartut illoqarfinni naammattuugassaasarput, mitaarutissanik atisalersortoqartarpoq meeqqatullusooq atisalersoqqaatut ileqqulersortarlutik.
Ulloq malunnartinniarlugu, tassa januaarip arfernat, saqqummersitsisoqarpoq kiinarpanik 1900-kkut aallartilaarneraneersunik ammimit sanaanik marlunnik. Saqqummersitsivimmi igalaartalimmi kiinarpat Sisimiut Katersugaasiviat suleqatigalugu Taseraliup torsuusarsuani saqqummersinneqarput.
Aamma Taseralik mitaartut tamarmik qaaqquai kulturip illorsuanut nalunaaqutaq 19.30, tassani mitaallaqqinnerpaaq soorunami aamma qittarinnerpaaq toqqarneqassalluni. Naliliisuussapput Abigail Markussen, Flemming Larsen aamma Ammunnguaq Jonathansen.