Kujataani inuttaasunik ataatsimiititsisaqattaaartoqassaaq
Kuannersuarni piavimmik qaarusoqalernissaa illugiillu oqaloqatigiissutaassaaq
Greenland Minerals and Energy A/S-ip sapaatit akunneranni aggersumik illoqarfinni ukunani Narsaq, Nanortalik aamma Qaqrtoq inuttaasunik ataatsimiititseqattaarnissani aallatissavai, Kuannersuarni qaarusummik piiaaffiliornissaq oqallisigitinneqassalluni, ingerlatsivik tusagassiuutitigut nalunaarummi paasissutissiivoq.
Illoqarfinni pingasuni ataatsimiititsisarnerni manna tikillugu Kuannersuarnut tunngatillugu sulianut kiliffik sammineqassaaq, kiisalu Greenland Minerals and Energy A/S-imit 2011-mi suliassat ilisimatitsissutigineqassapput.
Sapaatit akunneranni tulliani ataatsimiititsisaqattaarnerit ukiup ingerlanerani Kujataani illoqarfinni illugiilluni oqaloqatigiinnertalinnik ataatsimiititsisarnerit malitseqartinneqassapput. Tamatuma saniatigut soqutigisaqartut arlalippassuit piaanianiarluni suliniummut attuumassuteqartut Kuannersuarnut tunngasunik suliaqarnermut qanimut peqataatinneqassapput, ukioq manna suliassanut ilaassapput misissueqqinnerit, misileraarluni qillerinerit kiisalu piaanermut atatillugu avatangiisinik, sillimaniarnermik misissueqqissaarnerit aamma aningaasaqarnermut tunngasut sammineqassallutik.
Ataatsimiinnerit ingerlanneqassapput ilisimatitsisussaanermut pisussaatitaaffik tunngavigalugu, tamanna Greenland Minerals and Energy A/S-ip akuersissummut pigisaanut Namminersorlutik Oqartussat Aatsitassanut Naalakkersuisoqarfianeersumut ilaavoq.
Ataatsimiinnissat pilersaarutigineqartut: Narsaq marlunngorneq 11. januar. Nanortalik pingasunngorneq 12. januar. Qaqrtoq Sisamanngorneq 13. januar.