Mike F. Thomsen Tallimanngorneruvoq
Kalaallit Nunaata Isiginnaartitsisarfiata isiginnaagassiai siulliit takutinneqassapput
Nipilersortartoq, erinarsortartoq isiginnaartitsisartorlu nuannarineqartoq Mike F. Thomsen, Ilulissaneersoq, Tallimanngornerussaaq isiginnaartitsisartorlu Axel Raahauge, Nanortalimmeersoq, Robinson Crusoe-ssaaq, Kalaallit Nunaata Isiginnaartitsisarfiata isiginnaagassiaq "Robinson Crusoe" februaarimi takuteqqaarpagu.
Tuluup-canadamiup atuakkiortup Keith Johnstone-p tuluk umiartortartoq kiattumi qeqertamut inuilaamut pisoq, ataatsimilli Tallimanngornermik atilimmik inulimmu, pillugu isiginnaagassiap manuskriptia allassimavaa. Keith Johnstonep Daniel Defoep 1719-imi atuakkiaa aallaavigalugu isiginnaagassiaani tuluit nunasiaateqarnerannik oqaluttuarisaanera uparuartorneqarpoq, qularnanngitsumilli qallunaat Kalaallit Nunaannik nunasiaqarnerannut sanilliunneqarsinnaalluni.
Kalaallit Nunaatali Isiginnaartitsisarfia arfininngornermi januaarip 22-ianni unnummi kulturisiorfimmi takutitseqqaariissaaq Nuummi kulturip illorsuani katuami, tassani Mike F. Thomsen, Makka Kleist aamma Svenn B. Syrin isiginnaartitsisoralugit takutinneqassalluni qiiaammernartoq "Aliortukkat".
Qiiaammernartoq ulluni tulliuttuni Silamiut Nuummi radiohusitoqqami isiginnaartitsisarfianni isiginnaartitsissutigineqartassaaq.
Nunap isiginnaartitsisarfia
Januaarip aallaqqaataani Kalaallit Nunaat isiginnaartitsinermut inatsisertaarpoq tassuunakkut pilersinneqarlutik Kalaallit Nunaata Isiginnaartitsiarfia isiginnaartitsisartutullu ilinniagaqarneq.
Kalaallit Nunaata Isiginnaartitsisarfia januaarimi februaarimilu isiginnaagassianik marlunnik aallartereernissaanut pissutaavoq isiginnartitsiarfiup Silamiut sulisui, iniutaat sæsonimullu pilersaarutaat tigusimammagit. Tamanna peqatigalugu Silamiut, siorna ukiunik 25-inngortorsiorlutik nalliuttorsiortut, atorunnaarsinneqarput.
- Silamiuneersoq Svenn B. Syrin ukiup affaani tulliuttumi Kalaallit Nunaata Isiginnaartitsisarfiata pisortarigallataatut atorfinitsipparput, nunap isiginnaartitsisarfiata siulersuisuini siulittaasoq Juaaka Lyberth oqaluttuarpoq.
Isiginnaartitsisarfiup pisortaatut atorfik piffissami aggersumi inuttassarsiuunneqassaaq, atorfinitsitsinerli ilutigalugu nunap isiginnaartitsiarfianut atatillugu isiginnaartitsiartutut ilinniagaqarnermut nalunaarusiortoqassaaq isiginnaartitsisartunngorniallu siulliit aggustimi tiguneqassallutik.
2011-mut aningaasanut inatsisikkut Kalaallit Nunaata Isiginnaartitsisarfianut 5,9 millioner koruunit atugassanngortinneqarput, aningaasallu 2012-imi 8,5 millioner koruuninut 2012-imilu 9,7 millioner koruuninut amerlineqassapput.