Allattoqarfimmi pisortaq nutaaq

Elite Sport Greenland aalajangerpoq Lauritz Heilmann allattoqarfimmi pisortatut atorfinitsinniarlugu, ingerlatsivik tusagassiorfinnut nalunaarutikkut paasissutissiivoq.

Team Grønlandip siulersuisuisa oqaaseqaatikkut Lauritz Heilmann ima tikilluaqquaat:

"Lauritz Heilmannip atorfinitsinneqarneratigut Maria Grødemip Elite Sport Greenlandimi pikkorilluni suliaa nangeqqissinnaalerpoq. Lauritz Heilmann inuk ilakkuminartuuvoq Elite Sport Greenlandip allattoqarfiani suliassanik assigiinngitsorpassuarnik isumaginninnissaminut eqqortunik piginnaasalik. Neriuppugut Elite Sport Greenlandip aningaasaliisuisa suleqataasalu Lauritz tikilluaqqulluassagaat."

Lauritz Heilmann 30-nik ukioqarpoq aappanilu qitornartillu Nuummi najugalik. Timersornikkut Taekwon-do-rtartuusimavoq nunarsuarmilu normu 2-usimalluni 2007-imi VM-imi sølvinnannermi kingorna. Tamatuma saniatigut nunanut allanut unammisartunut sungiusaasuuvoq kalaallinilu siullersaalluni nunani tamalaani Taekwon-do-mi instruktøriulluni.

Lauritz Heilmann siusinnerusukkut Asiami sulisimavoq helikopterimillu timmisartortartutut ilinniakkap ilaa tigusimallugu. Qallunaatut, kalaallisut tuluttullu oqalullunilu allassinnaaovq, franskisut oqalussinnaavoq aammalu norskisut, svenskisut spaniamiutullu paasisinnaalluni.

Lauritz Heilmann januaarip 10-anni 2011 atorfinissaaq.