Nunat inuiisa oqallittarfittaavat

Issittumi nunat inuiisa kattuffii arfinillit nunat inuiisa oqallittarfiannik nutaamik pilersitsipput: The Permanent Participants Caucus Initiative, PPCI, tamanna Københavnimi nunat inuiisa allattoqarfiannit (IPS Arctic Council) tusagassiorfinnut nalunaarutikkut nalunaarutigineqarpoq.

Issittumi nunat inuiisa kattuffii arfinillit, Arktisk Rådimi ataavartumik peqataasutut inissisimasut (Permanent Participants PP), ilaatigut ICC, Samerådet aamma amerikarmiut russillu kattuffii, sinnerlugit PPCI-mik suliniut suliarineqarsimavoq Arctic Council Indigenous Peoples Secretariat-imit (IPS).

PPCI-mik suliniut Nordisk Ministerådip issittumut aningaasaliissutaanit 200.000 koruuninik tapiiffigineqarpoq, IPS-illu neriuutigaa allanit suli 80.000 koruuninik pissarsisinnaassalluni.

Suliniummi siunertaavoq kattuffinnit taakkunannga arfinilinnit, tamakkualu Arktisk Rådimi suleqatigisaannit aallartitat workshopertinneqassasut. Workshopimik siunertaavoq maanna siunissamilu PP-tut inissisimanerup imarisaata oqallisiginissaa, Arktisk Rådimik maanna pitsanngorsaalluni naleqqussaallunilu suliniuteqarnerup kingunerisaanik.

Nordisk Ministerrådip PPCI-mik suliniummut tapiissuteqarnera pissuteqarpoq rådip nunat inoqqaavisa akulerutsinnissaanik tapersersuisarneranik, tamatumani ilanngullugit samit inuillu, nunani avannarlerni, issittumi nunanilu tamalaani suleqatigiinnermi.

PPCI Workshop siunissami PP-mi oqalliffimmik pilersitsinissamut periarfissanik qulaajaaqataasinnaavoq, kiisalu PP-miittut aaqqiissutissanut siunnersuutaannik oqaasertalersueqataasinnaalluni, tulleriissaareqataasinnaallluni naligiissaarisinnaallunilu.

Workshop kinguneqassaaq PP Caucus pilersinnissaanut iliuusissatut pilersaarummik Arktisk Rådimik nukittorsaanerup ilaatut, maanna tamanna oqaluuserineqarluni, minnerunngitsumik nunat avannarliit oqartussaaffiattut.