Najugaqarfimmi aallaasersortoq
Angut 41-nik ukiulik marloriarluni aallaariarpoq imminorniarlunilu sioorasaartilluni
Nuummi politiit ullumi nal. 0925 angut kalaaleq 41-nik ukiulik tigusaraat Nuussuarmi aallaasersornermut atatillugu, vicepolitikommissær Poul Petersen tusagassiorfinnut nalunaarutikkut paasissutissiivoq.
– Tigusarineqartoq tamanna sioqqullugu aallaammik sakkortuumik marloriarluni aallaariarsimavoq imminornissaminillu sioorasaarilluni. Politiit biilertut Atertamukartinneqarput, iaatigullu politiit inissiamut iserniartartui aggeqquneqarput.
Angut iluatsinngitsumik attaveqarfiginiarneqarpoq isumaqatigiinniarfigineqaraluarlunilu, taamaattumik politiit gas-imik qulliliornartumik inissiamut aallaartitispput. Kinguninngua angut tigusarineqarpoq. Taanna maanna poltiiinit paarineqarpoq politiinullu malittarisassanik unioqqutitsisutut unnerluutigineqarluni.
Naatsorsuutigineqarpoq akiliisinneqassasoq aallaammillu arsaarneqassasoq. Pisimasumut atatillugu qatserisartut ambulanceat aamma qaaqquneqarpoq aqqusinernik assersuinermut. Tigusarinninniarneq eqqissisimasumik ingerlavoq inunnillu ajoqusertoqanngilaq.
Tigusarineqartup oqaatigisimanngilaa suna pissutigalugu taamaasiornerluni, Poul Petersen paasissutissiivoq.