Kronprinsip suliassani allat tamaasa unitsippai
Kronprins Frederiup suliassani allat tamaasa unitsippai sisamanngornermi Rigshospitalimi nuliani misissortereermat, allappoq eb.dk.
Kronprinsessep Maryp naartui marlulissat inunngorusulersimapput.
Marlulissanut anaananngortussaq angutaallu, kronprins Frederik, sisamanngornermi ualikkut kingusissukkut Rigshospitalimiipput, ernilinnginnermi immaqa kingullerpaamik misissortikkunarluni.
Kunngikkormiut avammut paasissutissiisartua, Lene Ballesby, bt.dk-mut oqaaseqarnera naapertorlugu angajoqqaanngortussat sisamanngornermi unnukkut kingusissukkut angerlarsimaffittaaminnut Amalienborgimiittumut uterput.
Kisianni tassa ernisussiortussaqatigiinnut nakorsiareernerup kingorna kronprins Frederiup pisortatigoortumik suliassani allat tamaasa taamaatippai. Taamatut allaaserisaqarpoq eb.dk.
Soorlu Købstædernes Forsikringip ukiunik 250-inngortorsiorluni nalliuttorsiornermi Statens Museum for Kunstimi sapaatit akunneranni tulliuttumi sisamanngornermi januarip 13-iani nerersuaqatigiinnissaani peqataanissaraluani taamaatippaa.
Kunngikkormiut avammut paasissutissiisartua Lene Ballesby ippassaq unnukkut Ekstra Bladep telefonikkut saaffiginnissutaa akissuteqarfiginngilaa, unnukkulli siusinnerusukkut bt.dk-mut oqarluni erninissamut piffissaliisoqarsimanngitsoq, Ritzau taamatut allaaserisaqarpoq.