Danskit naalakkersuisui CIAp timmisartui pillugit apeqqaarissaarfigineqassapput
Illuatungiliuttut maannakkut piumasaraat CIAp timmisartuussisarneri pillugi misissuinissaq pilertortumik suliassatut ingerlanneqarnissaa.
Danskit naalakkersuisuisa nuimanersaat ulluni aggersuni nassuiaanissaminnut ulapittussanngorput.
Folketingip ataatsimiittarfiani apeqqarissaarnerit pilertortumik aaqqissuutassat aamma nunanut allanut politikki pillugu ataatsimiititaliami apeqqutit ullormut oqaluuserisassanut ilanngupput Politikenip, politikkeri atorfilittaasalu nuimasut CIAp danskit, savalimmiut aamma kalaallit silaannartaat aqqusaarlugit tigusanik anngallassisarsimanerat pillugu misissuinermut atatillugu marloqiusamik iliuuseqartarsimanerat pillugu, isertuussanik saqqummiussinerata kingorna.
Missuinerup 2008-mi allatinnissaa sioqqullugu taamani nunanut allanut ministeriusoq Per Stig Møller (K) neriorsuivoq amerikamiut timmisartuussisarneri pillugit sukumiisumik misissuisoqassasoq. Kisianni amerikamiut aallartitaqarfiannit nalunaarutit qularnaarpaat danskit naalakkersuisuisa qullersaasa USA-mit paasissutissanik nutaanik pissarsinissaq kissaatigisimanngikkaat.
Siornatigut nunanut allanut ministeriusimasup Niels Helveg Petersenip (R) nunanut allanut ministerimut nunanut allanut politikki pillugu ataatsimiititaliami pisimasoq pillugu apeqquteqarniarpoq. Taamatuttaaq Frank Aaen apeqqarissaarnissamut pilertortumik pisussamut ataatsimiigiaqqusiniarpoq.
- Uagut pisimasup pilertortumik sammeqqinneqarnissaa pisariaqartipparput uagullu amerlanerussuteqartitsiniarsariniarpugut Per Stig Møllerip naalagaaffiup eqqartuussisuinut sassartinneqarnissaa anguniarlugu kiisalu kikkunnulluunniit attuumassuteqanngitsunik misissuititsinissap ingerlanneqarsinnaanera misileqqinniarlugu, Frank Aaen nassuiaavoq.
Kalaallit folketingimut ilaasortap Juliane Henningsenip pisimasoq »quiajaannartutut« taavaa ippassarlut sermitsiaq.ag-imut ilisimatitsissutigalugu Naalakkersuisut siulittaasuata danskit naalakkersuisuisa qullersaannut pisimasoq saqqummiunniaraa.
Politiken taamatut allappoq.