Alluitsup Paani imeq salinneqassaaq

Nukissiorfiit Alluitsup Paani erngup aqqutai pingasunngornermut unnuami salinniarpaa, erngup napparsimalissutaasinnaasunik bakteriaqarnera pissutigalugu.

Allutsup Paani imeq napparsimalissutaasinnaasunik bakteeriaqarpoq taamaattumillu salinneqassalluni. Ass.: Sermitsiaq.AG

Alluitsup Paani imeq marlunngornermi januaarip 11-ianni nal. 23:00-miit pingasunngornermi januaarip 12-ianni nal. 07:00-mut salinneqassaaq.

- Atuisartut nammineq illuminni toqqaannartumik imerlersorneqartut piffissami tassani imermik imissanngillat. Tamatuma saniatigut aqagu ullaakkut nalunaaqutaq 07:00 kingorna imeq minutsit tallimat missaanni kuutsittariaqarpoq erngup siullermeersumik atorneqalinnginnerani, nukissiorfiit.gl allappoq.

Piffissami tassanissaaq imertartarfiit matoqqassapput imermillu atorfissaqartitsisut imermik minguitsumik innaallagissiorfiup eqqaani imertaassuarmit imermik aallersinnaapput.

Erngup imigassap napparsimalissutaasinnaasunik bakteeriaqarnera pissutigalugu Alluitsup Paani innuttaasut 2010-mi novembarip 22-ianniilli inanneqarsimapput imeq imilertinnagu qalaattaqqullugu. Bakterissat peerniaqattaartaraluarnerat iluatsinneq ajorsimavoq taamaattumillu Nukissiorfiit saligut sakkkortunerulaartoq atussavaa, iluaqutaassasoq neriuutigalugu.

- Saligut taanna pissutigalugu unnuap ingerlanerani imeq imerneqaqqusaanngilaq. Erngup qalaannera iluaqutaanngilaq, Nukissiorfiit allappoq.

Imermik pilersuineq nalinginnaasumik ingerlaqqilissaaq kingusinnerpaamik pingasunngornermi ullaakkut nal. 07:00.

Powered by Labrador CMS