Allakkat timmisartuussiunnaarnermit eqqugaapput
Kalaallit Nunaannut allakkat tassanngaaniillu Air Greenlandimi isumaqatigiissuteqarsinnaajunnaarneq pissutigalugu kinguaattoorput.
Air Greenlandimi aaqqiagiinngissuteqarnerup Danmarkip aamma Kalaallit Nunaata akornanni allakkat timmisartukkoortut kinguaattoortissavai. Allakkat umiarsuakkoortut ilaat aammattaaq eqqugaassapput, tamatumunnga pissutaavoq allakkat taakku Kalaallit Nunaannut tikinnerisa kingorna akutunngitsutigut timmisartumik ingerlateqqinneqartarnerat, Post Danmark ilisimatitsivoq.
Air Greenlandip sulisuni timmisartortartut aamma timmisartuni saqisut suliartoqqujunnaarlugit mattuppai, suliffeqarfiullu timmisartornissai tamarmik maannakkuugallartoq aqagumut 12. januaarimut unitsinneqarput.
Allakkanik timmisartukkut nassiussinermut taarsiullugu allakkat aamma poortukkat umiarsuakkut nassiunneqarsinnaapput, kisianni taamaaliussagaanni nassiussat aatsaat ullut 15-iniit 27-nut ingerlareerunik apuuffissaminnut apuussinnaasapput, Ritzau ilisimatitsivoq.
- Massakkut allakkat timmisartukkut Kalaallit Nunaannut ingerlasussat Københavnimi katersorallarpavut piareersimavugullu sapinngisamik, tamanna ajornarunnaarpat, pilertornerpaamik ingerlateqqinnissaannut, PostDanmarkimi Produktion & Transportimi pisortaq Henning Christensen oqarpoq.