Ladies Circlep Amarngivat tapiissuteqarfigaa
Ladies Circle Nuuk Tasiilami ornittakkamut Amarngivat 20.000 koruuninik tunisivoq
1992-imi Red Barnetip aamma Foreningen Grønlandske Børnip Tasiilami ornittagaq Amarngivat aallartippaat, meeqqanut inuusuttunullu suliniut. Siunertaavoq isumaginninnikkut ajornartorsiutit illua'tungilernissaart meeqqallu inuunerisa pitsaassusiata annertusarnissaa.
- Paasinarsivoq Amarngivat pisariaqartinneqartorujussuusoq suliniullu ornittakkatut ingerlalluartutut ineriartorpoq maanna aamma Kulusummi Kuummiunilu immikkoortortaqarfeqalersimasoq, Ladies Circle Nuuk tusagassiorfinnut nalunaarummini allappoq.
Ladies Circle 20.000 koruuninik tunissuteqarpoq Ammassalimmi eqqaanilu meeqqanut atugarliortunut atugassanik. Ornittakkap pisortaa Lars Göransson oqaluttuarpoq aningaasat atorfissaqartinneqarluartut.
- Ladies Circlep tunissutai 20.000 koruunit meeqqanik sullissinermut atorneqassapput, meeqqanullu piviusumik suliniuteqarnernut atatillugu atorneqassallutik, meeqqat avatangiisini qanittumiittut ajornartorsiutiminnik suliaqarsinnaallutik. Sulisut siulersuisullu suliniut tamanna meeqqanillu sullinneq ingerlateqqissavaat. Tapiissutit pissarsiavut meeqqat immikkut misigisaqartinnissaanut pingaaruteqartorujussuupput, Lars Göransson oqaluttuarpoq.
Amarngivat Tasiilami meeqqat atugarliortut kinguaassiuutitigullu atornerlunneqartut atugaat kisiisa qanimut malinnaaffiginngilaa, aammattaarli nunaqarfinni Kulusummi Kuummiunilu, ulluinnarni meerarpaaluit ilaat naapittaramikkit. Tamatuma saniatigut Amarngivat siulersuisuisa katitigaanerisa, tassa ilinniartitsisup, juumuup, tarnip pissusianik ilisimasallip il.il. kinguneraa pissutsinik takunnissinneraanerat aammalu isumaginninnermi ajornartorsiutinik takunnissinnaanerat - Tasiilamiinnaanngitsoq, aammattaarli Ammassallip pigisaani tamarmi.
Ladies Circle tassaavoq nunani tamalaani sulinieqatigiiffik politikkimut atuumassuteqanngitsut nunani 31-ini peqatigiiffilik. Ukiut tamaasa Ladies Circle Nuuk nunatsinni suliniutinut aningaasanik tunniussisarpoq tamatumalu saniatigut aamma nunani tamalaani ikiuiniaqatigiiffinnut tunissuteqartarluni peqatigiiffiup nunani tamalaani klubbii suleqatigalugit.
- Ladies Circle Nuuk-p Amarngivat ukiorpassuarni meeqqanik inuusuttunillu suliniuteqarnera tapersersorusuppaa. Amarngivat nersualaagassaavoq ikiuinermi isumassunermilu assersuutissatuty - aamma ulluinnarni immikkut ikiortariaqartunut Ladies Circle Nuuk-p siulittaasua Annie Busk Lennert oqarpoq.