Robin Hood eqqartuunneqaroq
Angut Kleist akunnerni 100-ni iinuiaqatigiinni sulisitaasussatut, tarnikkut katsorsarneqartussanut, imerajuttuunermut katsorsarneqartussatut kiisalu ukiuni marlunni Pinerluuteqarsimasunik Isumaginniffimmit nakkutigineqartussatut pineqaatissinneqarpoq nassaanik unioqqutitsilluni atuisimasutut
Sisamanngormat ualikkut Kalaallit Nunaata Eqqartuussisuuneqarfiani suliassami "Robin Hood"-imik taagorneqartumi eqqartuussisoqarpoq.
Unnerluutigineqartoq Angut Kleist akunnerni 100-ni inuiaqatigiinni sulisitaasussanngortinneqarpoq, tarnikkut katsorsagassanngortinneqarpoq, imerajuttuunermut katsorsagassanngortinneqarpoq kiisalu ukiuni marlunni Pinerluuteqarsimasunik Isumaginniffimmit nakkutigisassanngortinneqarpoq nassaanik unioqqutitsilluni atuisimasutut.
Angut Kleist, inuit akornanni "Robin Hood"-itut ilsimaneqalersoq, kukkunikkut BRF-bankimit 1,3 millioner koruuninik tunineqarpoq. Kukkunerup paasineqannginnerani imminut Nanortalimmiunullu 421.500 koruunit atorsimavai. Taamaattumik nassaanik unioqqutitsilluni atuisimasutut unnerluutigineqarpoq.
2009-mi Angut Kleist Kredsrettimi pinngitsuutinneqarpoq, unnerluussisulli eqqartuussut Kalaallit Nunaata Eqqartuussisuuneqarfianut ingerlateqqippaat, ullumilu taanna eqqartuussivoq.
- Eqqartuussut eqqartuussisuuneqarfiullu inerniliinera naammagisimaarparput, unnerluussisuneersoq Mette Damgaard eqqartuussinerup kinguninngua oqarpoq.
Unnerluutigineqartoq Angut Kleist nammineq najuutinngilaq, inuttut imaluunniit videokut, Nanortalimmiillunilu eqqartuussut aalajangerneqarmat. Suliassami alloriaqqissanersoq illersuisuata Ulrik Bildorfip oqaatigiumanngilaa.
- Kalaallit Nunaata Eqqartuussisuuneqarfiata aalajangiinera ataqqineqassaaq, Ulrik Bildorf naatsumik oqarpoq.