Pisut ajortut Espersen tunuartippaat

Det Konservative unnuaq nutaamik politikkikkut siuttortaarput. Lene Espersenip tunuarnerata kingorna qularnanngitsumik Lars Barfoed siulittaasunngussaaq.

Lene Espersenip tunuarnissaa aallartippoq Issittoq pillugu ataatsimeeqataanani Mallorcami feriarami. Ass.: Leiff Josefsen

Ukiuni kingullerni Lene Espersen pisunik ajortunik nalaataqartarsimavoq. Sisamanngormat tunniutiinnarpoq.

Lene Espersen 2008-mi septembarip 27-ianni Bendt Bendtsen kingoraarlugu konservativeni siulittaasunngormat anguniagaq ersarissimavoq:

Partiip Bendtsenip "Mr. 10 procentitut" isigineqarnera qaangerniassavaa, Espersenillu isumagissavaa De Konservative qallunaat qulerarterutaannit amerlanerusunik tapersersorneqarnissaa.

Isumasiuisarnerni De Konservativet Espersenip sunnertarsimavai, naggataatigulli partii tapersersornikippallaalerpoq. Maannalu partiimi siuttutut tunuarpoq.

Tamanna sioqqullugu pisut ajortut tulleriiaaginnarlugit Espersenip Hirtshalsimeersup nalaattarsimavai.

Tapersersorneqarunnaariartorneq aatsaat aallartilluarpoq siorna februaarimi nunanut allanut ministerinngornerata kingorna.

"Ferieministeri", taamatut taagorneqalerpoq sammineqartorujussuarmik Issittoq pillugu ataatsimiinnermut, ilaatigut amerikarmiut nunanut allanut ministeriannik Hillary Clintonimik peqataaffigineqartumut, peqataaniarnani nalunaarnerata kingorna.

Peqataannginnera sakkortuumik isornartorsiorneqarpoq, Espersenilu qaammatit marluk qaangiuttut sakkortuumik tatineqareerluni taamatut aalajangersimanini utoqqatsissutigaa.

Pisumi ajortumi allami aamma utoqqatsertariaqarsimavoq. Napparsimmavimmut namminersortunut akiliivallaartarsimanermik pisumi apeqqummut qissigusunnartumut Folketingimi eqqortumik akissuteqanngilaq.

Espersen malillugu konservativet folketingimi gruppiata nammineq akiliivallaarsimaneq naatsorsorsimavaat. Naatsorsuinerli tamanna Peqqissutsimut ministereqarfimmit suliarineqarsimavoq.

Espersenip peqqissimanerata saniatigut akissutaa Folketingip Aningaasanut Ataatsimiititaliaani siulittaasumit Kristian Thulesen Dahlimit "malunnaatilimmik isorineqarpoq".

Ukioq nutaaq aallartippoq Venstrep kiisami konservativet pingaartitaannik akuersaarnerannik - efterlønnip aaqqissuuteqqinneqarnissaa.

Tamatumanili politikkikkut ajugaaneq Espersenimut ilaanullu isumasiuinermi sunniutinngilaq, konservativet tapersersorneqarnerat 5 procentimiiginnarluni - 2007-imi qinersinermi angusamit affaannanngorluni.

Tamanna folketingimi gruppimut ingasappallaalerpoq Espersenilu tunuartariaqarpoq.

Nunanut allanut ministeriunini attatiinnassavaa, Ritzau allappoq.

Powered by Labrador CMS