Orniguttorpassuit
Naalakkersuisut ukiortaami ilassinninnerannut ambassadørit aatsaat taama amerlatigisut takkupput - Kalaallit Nunaat nunarsuarmit aatsaat taama sammineqartigaaq
Aatsitassarsiorneq nunallu tamalaat soqutiginninnerujussuat Kalaallit Nunaata nunanut allanut attuumassutaannut malussartitsivoq. Ukiualunnguit matuma siornatigut Københavnimi Kalaallit Sinniisoqarfianni ukiortaami ilassinnittarnerni ikittuinnaat aalajangersimasut takkuttarsimapput. Ullumi takkuttut ima amerlatigaat ulloq ilassinninnernut marlunnut avittariaqarluni - ataaseq diplomatinut folketingimilu ilaasortanut. Ataaserlu allanut.
Nutaatut pulaartut naalakkersuisut siulittaasuannit Kuupik Kleistimit inatsisartullu siulittaasuannit Josef Motzfeldtimit assammillugit tikilluaqquneqanngillat. Orniguttorpassuit sinniisoqarfiup pisortaanit, Tove Søvndahl Petersenimit tikilluaqquneqarput, taassumalu oqalugiartut aamma ilisaritippai, erinarsoqatigiit Aavaat Koret, ilassinninnerup nalaani arlaleriarlutik erinarsortartut, aallarniinerisa kingorna.
Tamatuma kingorna Kuupik Kleist naatsumik oqalugiarpoq siumut kingumullu qivialaarluni. Aammalu Juuntaap nunatsinnillu nalissaqanngitsumik piffinnut nutaaliaasunut isertitsisimanera oqaaseqarfigalugu.
Avatangiisinut nunanullu avannarlernut tunngasunut ministeri Karen Ellemann qallunaat naalakkersuisui sinnerlugit oqalugiarpoq neriorsuillunilu Kalaallit Nunaanni ineriartornermik Danmark tamatigut tapersersuiuassasoq.
Tamatuma kingorna pulaartut 100 sinneqartut kalaallit pindemadinik neripput, ilaatigut rugkiks qaleralimmik pujuukkamik, rygeostimik purløgimillu qallersuutillit, Coutun pujuukkamik tuttulik aammalu kimmenat iipilillu, kiisalu kalaallit savaaraannik tærtiliat, tassa illinnartut sassaalliutit ilamerngi imermik, viinnimik aamma Greenland Ice Cap Beer-imik iggiserlugit.
Takkuttorpassuit ilagaat hofmarskaliusimasoq Søren Haslund-Christensen, savalimmiunit folketingimut ilaasortaq Høgni Hoydal, amerikarmiut ambassadørit Melissa Ford, australiamiut ambassadøriat James Choi, Folketingip præsidentia Thor Pedersen allarpassuillu.
Ilassinninnermit siullermit assilisat takukkit uani.
Kingusinnerusukkut ilassinnerup aappaanit allaaserisaqassaasut assinillu takutitsissalluta.