CIAp isertortumik timmisartuussisarneri naatsumik

CIAp timmisatumik qulaasisarsimaneqarneranut aamma Kalaallit Nunaannut nunnittarsimanerarneqarneranut tunngasut 2006-imi siullermik saqqummiunneqarput. Taamanikkut danskit naalakkersuisui nalunaarput taamaattoqarsimanngitsoq.

Asseq: Colin Perkel

DR-ip pivisumik aallakaatitassiaa 2008-p aallartinnerani 'CIAp danskinik attaveqarnera'ta amerikamiut isertortumik paasiniaasartuisa tigusarisimasaminnik danskit silaannartaa aqqusaarlugu angallassisarsimagaanerat qitiutinneqaqqilerpoq.

Pivisutut aallakaatitassiap pisimasinnaasutut saqqummiuppaa CIA suliffeqarfiit isertukkat aqqutigalugit ukiuni arlalinni Narsarsuaq atortarsimagaat, tigusarisimasatik nunanut soorlu makkununnga Rumænien, Usbekistan aamma Afghanistanimut ingerlateqqinnginneranni, isumaqartoqarpoq CIA nunani taakkunani ajortumeeriniatut pasisanut isertortunik paarnaarussiveqartoq.

Siornatigut CIAmi tigusarisimasat pillugit isertortumik suliaqartarneranni pisortaasimasoq Michael Scheuer oqarpoq, nalinginnaasuusoq amerikamiut isertortumik paasiniaasartuisa ileqqorigaat eqqunngitsumik kinaassutsiminnik nalunaartarneq, nunat allat silaannartaat aqqusaaraangamikkit aamma nunat allat mittarfii orsersorniarlutik atoraangaimikkit.

Danskit naalakkersuisui aalajangerput ministereqarfiit assigiinngitsut peqataaffigisaannik suleqatigiissitaliorniarlutik, kisianni danskit naalakkersuisui aamma Dansk Folkepartip sumulluunniit attuumassuteqanngitsumik CIAmut unnerluussutinik misissuisussamik pilersitsinissaq itigartippaat.

Siusinnerusukkut Europaparlamentip nalunaarusiami inerniliussaraa CIA arlalippassuariarluni akuerineqanngitsumik angallassisarsimasoq aamma ajortumeeriniartartutut pasisanik europami tigusarinnittarsimasoq nunap naalakkersuisuisa isertortumik akuerisaannik.

Nalunaarusiaq malillugu ikinnerpaamik CIA 1245-riarluni 2001-imiit 2005-imut timmisartuussisarsimavoq. 2001-imiilli danskit aamma kalaallit silaannartaat arlalippassuarialutik aqqutigineqartarsimapput aamma mittarfinnut mittoqartarsimavoq, timmisartut CIAmut attuumassuteqarnerakkat atorlugit.

Naak USAp præsidenterisimasaata George W. Bush nassuerutigisimagaluaraa CIAp nunani allani isertukkanik paarnaarussiveqarsimasoq, taakkunanilu ajortumeeriniartartutut pasisat killisiorneqartarsimasut, taamaattorli isertortumik paasiniaasartut uppernarsanngisaannarsimavaat isertortumik tigusanik timmisartuusisoqartarsimanera.

Powered by Labrador CMS