Kuupik: Danskit marloqiusamik pissusilersorsorinarput
Naalakkersuisut Siulittaasuata Løkke aamma Lene Espersen naapikkunigit piumasaraa suut tamarmik saqqummiunneqarnissaat.
- Ataatsimut isigalugu danskit naalakkersuisui tatigaavut. Tamanna qularutigineqassanngilluinnarpoq, kisianni pisumi matumani soorluuna marloqiusamik iliuuseqartoqarsimasoq.
Taamak Kuupik Kleist knr.gl-imut oqarpoq CIAp unioqqutitsilluni tigusanik angallassisarsimanerat pillugu paasissutissat kingulliit saqqummiunneqarnerannut tunngatillugu.
- Soorunami tamanna ilungersunartutut isigaara, Kuupik Kleist nangippoq. Pisimasup qanoq kinguneqarsinnaanera pillugu oqaaseqarusunngilaq statsminister Lars Løkke Rasmussen (V) aamma Lene Espersen (K) ataatsimeeqatigeqqaartinnagit.
Naalakkersuisut Siulittaasuata piumasaqaatigaa danskit ministeriisa taakku marluk sunik tamanik saqqummiussinissaat.
- Pappiaqqat, Wikileaksimit saqqummiunneqartut, ilumoorsimappata pisimasoq ilungersunartorujussuuvoq tamatumalu Kalaallit Nunaata aamma Danmarkip akornanni tatigeqatigiinneq innarlersinnaavaa, oqarpoq.
- Siullermik pingaarnertullu paasissutissat, Wikileaksimit saqqummiunneqartut, uppernarsaasertinniarpavut. Uagut paaserusupparput paasissutissanut taakkununnga suut tunuliaqutaasimanersut, Kuupik Kleist naggasiivoq.