Mattussinermi ilaasut tusintillit eqqugaapput

Air Greenlandip timmisartuisa tamarmik aallarnissaat sapaatip akunnerata sinnerani taamaatiinnarneqarallarpoq, ilaasullu ikinnerpaamik 2.000-t Air Greenlandip timmisartumilu sulisut aaqqiagiinngissuteqarnerannik eqqorneqarput, aaqqiagiinnginnerlu ullormut selskabimut 1 million koruuninik akeqarpoq, takeoff.dk allappoq.

- Kalaalit Nunaanni ilaasut 529-it sapaatip akunnerani uani Kangerlussuarmit Københavniliarnissaminnut utaqqipput, killormullu Københavnimit Kalaallit Nunaaliarniartut 551-it utaqqipput, Air Greenlandimi aningaasarsiornermut pisortaaq Udo Glashff takeoff.dk-mut oqarpoq.

Tamatuma saniatigut ilaasut 1.059-it sapaatip akunnerani uani Kalaallit Nunaata iluani timmisartuunneqartussaagaluarput, kisitsisinilu taakkunani ilaasut assersuutigalugu Københavnimit Kangerlussualiartussat tassanngaanniillu assersuutigalugu Nuummukartussat ilaanngillat.

- Kalaallit Nunaanni ilaasut eqqorneqartut akunnittarfimmi najugaqarnerat ullaakkorsiortarnerallu akilissavarput, ilaasullu Københavnimit Kalaallit Nunaaliartussat Københavnimi akunnittarfimmiinnerisa ullaakkorsiortarnerisalu saniatigut aamma unnukkorsiortarnerat akilissavaput, Udo Glashoff oqarpoq. Taamatut assigiinngissuteqarnermut pissutaavoq Danmarkimi - Kalaallit Nunaanni taamaanngitsoq - timmisartumut ikeqqusaannginnermut EU-p malittarisassaa atorneqarmat.

Aaqqiagiinngissuteqarneq Air Greelandimut ullormut 1 million koruunit missaannik akeqartoq Udo Glashoffip takeoff.dk-mut nalilerpaa, ilanngullugulu oqaatigalugu illua'tungeriit akornanni attaveqartoqanngitsoq.

Københavnimi isumaqatigiissitsiniartartup illua'tungeriit isumaqatigiissinniarsimagaluarpai.

Air Greenlandip timmisartuini laasussaty selskabip attaveqarfigissavai billetsit akiisa utertinnissaannik neqeroorfigalugut januaarip 22-iata tungaanut.

Nunatta naalakkersuisui inatsimmik immikkut ittumik akuersissuteqarsinnaapput aaqqiagiinnginnermik atorunnaarsitsisumik.

Air Greenland ukiumi naatsorsuiffiusumi kingullermi, 2009-mi, katillugit 21-inik sumunngarfilimmi, 400.000-nik ilaasoqarfilimmi, 1,1 millarder koruunit kaaviaartissimavai 36,8 mio. kr.-nik sinneqartooruteqarluni. Selskahbi 13-inik timmisartuuteqarpoq 24-inillu helikopteriuteqarluni. Selskabi Namminersorlutik Oqartussanit SAS-millu (37,5 procentimik) piginneqataaffigineqarpoq, piginneqataassutillu sinneri 25 procentit qallunaat naalagaaffiata pigai.