Brahemik aallartippoq

Qallunaat arsarnernik ilisimatusarnerannik allaaserisaq takisooq "History of Geo- and Space Sciences"-imi ilanngunneqaqqammerpoq. Allaaserisamik allaatiginnittuuvoq Peter Stauning, DMI- mi ukiorpassuarni sulisuusimasoq.

1707-imi Københavnip qulaani arsarnerit, Ole Rømerip allaaserisai malilllugit titartarneqarsimasoq. DMI

- Qallunaat arsarnernik ilisimatusarnerannik oqaluttuaq aallartippoq qallunaap ulloriarsiuup tusaamasap Tycho Brahemik taassumalu 1582-imiit 1601-imut misissuinerinik", Peter Stauning arsarnernik ilisimatusarnerup oqaluttuassartaanik allaaserisamini oqaluttuarpoq.

- Aamma ulloriarsiooq Ole Rømer torrallaqalugu misissuisimavoq allaaserinnillunilu; pingaartumik 1707-imi Københavnip qulaani arsarneqarnersuanit".

Tamatuma saniatigut allaaserisami sammineqarput 1700-ukkut 1800-ukkullu ingerlaneranni ajoqersuiartortitap Hans Egedep siusissukkut nunatsinni arsarnernik misissuisimanera. 1880-ip missaani Sophus Tromholtip nunat tamalaat issittumut ukiuanni siullermi 1882-83-imi qallunaat suliniutaat pingaarutilik piareersarpaa nunatsinni arsarnernik misissussanik misissuinerminik. Issittullu ukiuani ilisimasassarsiortut Adam Paulsen qullersaralugu - kingorna DMI-mi pisortanngortoq - nunatsinnukarput arsarneq qimerluualaariartorlugu aammalu silasiornermik geomagnetiskimillu uuttortaajartorlutik.

Arsarnerit geomagnetiskimillu sajuppillannerit ataqatigiissoqarnerat 1823-imili H. C. Ørstedimit misissorneqarsimavoq.

- Taamanikkulli pinngortitamut fagit killingi ullumikkuminngarnit annikinnerusimapput. Taamaattumik arsarnerit silasiornermut attuumassuteqartinneqarpoq, assersuutigalugu geofysikimut imaluunniit ulloriarsiornermut pinnagu", Peter Stauning oqaluttuarpoq.

- H. C. Ørsted qallunaat silasiortarnerisa ineriartortinneranni aalajangiisuusumik inissisimasimavoq, tassa silasiornerup saniatigut tamatumani ilaatinneqarlutik Danmarkimit,Islandimit nunatsinnillu arsarnernik misissuinerit, kiisalu arsarnernik geomagnetiskimimillu ilisimatusarnerit.

DMI-p arsarnernik geomagnetismimillu ilisimatusarnerat qallunaat satellitsiannut siullermut, Ørstedimut, tunuliaqutaapput, taassuminnga nunarsuup magneteqassusia nalunaarsorneqartarluni. Ørsted 1999-imi qullartinneqarpoq sulilu atorluni", Peter Stauning naggasiivoq.

Arsarnerit pillugit allaaserisamut tamarmut DMI-mi linkeqarpoq.

Powered by Labrador CMS