Nunani Avannarlerni partiit saamerliuniat suleqatigiipput

Pinngortitap pisuussutai innuttaasut pigaat, taamak partiit saamerliuniat aamma mingutsitsinianngisut Nunani Avannarlerneersut, NGLA-milu suleqatigiittut isumaqarput

Saamerlerniit: Turid Leirvoll, SF'p partimi allattaanera (SF'p Siulittaasua Villy Søvndahl (peqataanngilaq piffissaqannginnami), VG´p partimi allattaanera Audur Lilja Erlingsdóttir, Island, partiip allattaanera Anki Ahlstein, V, Sverige, Siulittaasoq Lars Ohly peqataavoq assimili ilaanngilaq, partiip allattaanera Silje Schei Tveitdal, SV Norge, Juliane Henningsen, IA's politikkikkut siulittaasuata tullia, Siulittaasoq VG Islandimi aamma Aningaasarsiornermut naalakkersuisoq Steingr

Thorshavnimi NGLA'p (Nordic Left Green Alliance's) ataatsimiinnerani aalajangiunneqarpoq ukioq manna, nunani avannarlerni partiit saamerliuniat aamma mingutsitsinnginnissamik pingaartitsisut politikkikkut suleqatigiinnerani, pingaartinneqassasut pinngortitap pissarititai aamma issittoq. Kissaatigineqarpoq aammattaaq nunani baltikummimiittuni partiit saamerliuniat attaveqarfigineqarnerata pitsanngorsarneqarnissaa. Immikkoortut tamakku partiit NGLA-mi suleqatigiittut siulittaasuisa ukiumoortumik Thorshavnimi januaarimi ataatsimiinnerminni oqaluuserisarpassuisa ilaat, Inuit Ataqatigiit tusagassiuutitigut nalunaarutaanni tamanna erserpoq.

Aningaasarnermi politikki ajornartorsiorfiusoq aamma oqaluuserineqarpoq. Erseqqissaatigineqarpoq Islandimi naalakkersuisut, aningaasarsiornermut Steingrímur J. Sigfússon (VG Island) naalakkersuisoralugu, pissutsit immikkut illuinnartut atugaralugit nunat tamalaat akornanni pitsaanerusumik aniguisimasoq, nunanut allanut ajornartoornermik eqqorneqarsimasunut amerlasuunut naleqqiussilluni. NGLA-mi siulittaasut isumaqarput tamanna, piffissap ajornartorsiornerup nalaani akisussaassuseqartumik aningaasarsiornikkut polikikkeqarnissap qanoq pingaaruteqartigineranut, uppernarsaataasoq soorlu tamanna siusinnerusukkut SV-imit takutinneqarsimasoq, maannakkullu Kalaallit Nunaanni naalakkersuisunit nutaanit Inuit Ataqatigiinnik siuttoqartunit misigineqartoq.

Siulittaasut, Kristin Halvorsen (SV Norge), Steingrímur, J. Sigfússon (VG Island), Högni Höydal (Thjodveldi Færøerne), Lars Ohly V Sverige) aamma siulittaasut tulliata Juliane Henningsenip (IA Grønland) Nunani Avannarlerni Siunnersuisooqatigiinni partiit sulinerat tapersersorpaat, tassani suleqatigiit Venstre Socialistiske Grønne ilaasortaat saqqummiussipput pinngortitap pissarititai innuttaasunit pigineqarnissaannut tunngasumik.

Partiit NGLA-mi ilasortat arfineq marluupput nunanit avannarlermiut tamarmik ataatsimik ilaasortaatitaqarlutik. Matumani siulittaasut sisamat aamma siulittaasup tulia ataaseq aammattaaq partiit allattuuneri nunani amerlanerneersut ataatsimiipput. Savalimmiormiut Tjodveldid ataatsimiinnermut qaaqqusisuuvoq, europamut atatillugu saamerliuniat siunissaat pillugu isumasioqatigiinneq ingerlaneqarpoq. Tassani peqataapput Emilie Turenen, europaparlamentimi ilaasortaq, Hermann S. aamma Turid Leirvoll, oqallinnermik aallarniisuupput, peqatapputtaaq Thjodveldidip lagtingimi ilaasortaatitai.

Ataatsimiinnermi NGLA-mi siulittaasuuneq Inuit Ataqatigiinnit tiguneqarpoq partiip aallaattuunera Hjalmar Dahl siulittaasuussalluni 2001-miit januaari 2012-ip tungaanut. NGLA-mi ilaasortat akornanni ukiut tamaasa siulittaasuuneq partiit allatseqarfiisa akornanni nikerartinneqarpoq.

NGLA-mi siulittaasut tulliani ataatsimiinnissaat Nuummi Kalaallit Nunaanni 27. juuni 2011 ingerlanneqassaaq, naatsorsuutigineqarporlu NGLA-mi partiit ilaasortaat IA-p Ataatsimeersuarnerani Nuummi 24. - 26. juuni ingerlanneqartussami peqataanissaat.

Powered by Labrador CMS