Lars Rosing nersornaasigaavoq
"Nuummioq"-mi pingaarnertut inuttaq ippassaq Los Angelesimi Palm Springs International Filmfestivalimi "Angutitut filmiliortittutut pitsaanerpaatut" nersornaaserneqarpoq.
Palm Springs Internationale Filmfestival-imi filmit 40-t nunanit 65-ineersut ukioq manna Oscar-innanniartussatut toqqarneqarsimapput. Filmfestivalimi filminik naliliisartut nunanit tamalaaneersut immikkut ittut nunat 40-t filmiliaat isiginnaarsimavaat, tamatumunngalu atatillugu naliliisartut Lars Rosing angutini filmiliortittuni pitsaanerpaatut toqqarpaat, imatut tunngavilersuillutik: "Kalaallit Nunaata nunataani mersernartumi angutip inuusuttup toqumik utaqqineranik killitsinnartumik takutiitsinera pissutigalugu".
Naliliisartut ilaata Lars Rosing sinnerlugu nersornaat tiguvaa, taanna Nuummiimmat. Lars Rosingip nersornaat soorunami nuannaarutigaa.
- Qatanngutima Otto Rosingip (filmimi Nuummioq-mi ilitsersueqataasup, aaqqiss.) ippassaq unnukkut nalunaaqutaq arfineq-pingasunut tamatuminnga nalunaarfigaanga. Soorunami nuannaartorujussuuvunga tupaallaqalungalu, Ottolu qinnuigaara tamanna oqaatigeqqeqqullugu, aatsaallu paasilluarparta, Lars Rosing oqarpoq.
- Nersornaat ilinnut isiginnaartitsisartutullu qanoq sunniuteqassava?
- Tamanna filmiliortarnerni matorpassuarnik ammaassaaq. New Yorkimit qaaqquneqareersimavugut "Nuummioq" takutikkiartoqqullugu, taavalu nersornaaserneqarneq iluaqutaalluassaaq, Lars Rosing tulluusimaarluni akivoq.
"Nuummioq" Lars Rosingilu pillugit pingasunngorpat AG-mi annertunerusumik atuarsinnaavutit.