Suli angumerisinnaavat

ARNANUT Islandimut inuit marluk angalanissaanik eqquiniaatitsilluni unammisitsinermini akissuteqaammik immersugassamik kingusinnerpaamik nassiussiffissaq 1. februaarimut kinguartippaa

Immersorlugu akissuteqaatit Arnanut nassiussimagukku aarlerigalugulu Air Greenlandimi mattussinerup qaangiuteqqammersup kingunerisaanik apuutinngitsoorsimasinnaanera, taava ernumassanngilatit.

Eqquiniaanermut kikkut tamarmik peqataasinnaanerat qulakkeerniarlugu, aaqqissuisoqarfiup aalajangeqqammerpaa immersorlugit akissuteqaatinik kingusinerpaamik nassiussiffissaq kinguartinniarlugu.

- Uggornassaqaaq aamma naapertuilluarnerunani immersorlugit akissuteqaatit uniinnarsimasut makitsinermi ilaanngippata, Arnanut aaqqissuisua Heidi Møller oqarpoq.

- Eqquiniaanermi peqataanissaq qanoq soqutigineqartigaa?

- Annertungaatsiarpoq. Akissuteqaatinik immersukkanik amerlangaatsiartunik tigusaqareerpugu, kiisalu faxikkut aamma ullaaq allakkatigut tigusaqarpugut, Heidi Møller oqarpoq.

- Nuumminngikkaanni immersorlugulu akissuteqaat ingerlateqqissinnaajunnaarlugu, taava taanna faxikkut uunga: 32 24 99 nassiunneqarsinnaavoq, aaqqissuisoq ilisimatitsivoq.

Tunniussiffissaq kingulleq marlunngorneq 1. februaarimut kinguartinneqarpoq.

Powered by Labrador CMS