Ilinniagaqartut suliffeqarnissamut periarfissaat

Inatsisartunut ilaasortaq Kristian Jeremiassen, Siumut, Naalakkersuisoq apeqquteqarfigaa suliffissarsiornermi ilinniagaqartut salliutinneqartarnissaat anguniarlugu inatsisiliortoqarnissaa pilersaarutaanersoq.

Naalakkersuisut taamatut pilersaaruteqanngillat, Inuussutissarsiornermut aatsitassanullu Naalakkersuisoq, Ove Karl Berthelsen akivoq. Taanna isumaqarpoq sulisitsisut ataasiakkaat namminneq nalilersuisariaqartut. Aamma innersuussutigaa ilinniagaqartoq illoqarfimmi najugaqarfimmini suliffissarsisinnaanngippat allami illoqarfimmi suliffissarsiorsinnaasoq nuunnissaminullu tapiissuteqarfigineqarsinnaasoq nuttarnermut aningaasaliissutigisartakkanit Aningaasaqarnermut Inatsimmi immikkoortinneqarsimasunit.

Aamma Ove Karl Berthelsen isumaqarpoq eqqarsaatigineqartariaqartoq suliffeqarnermi tunngasut arlallit taamatut inatsisiliortoqarnissaanut pisariitsitsinngimmata.

- Suliffeqarfiit atorfimmut qinnuteqartunik nalilersuineranni ilinniagaqarsimaneq kisimiitillugu apeqqutaatinneqartanngilaq. Piginnaasat allat aamma taamatuttaaq pingaaruteqartigisinnaapput, akissuteqaatimini taamatut allappoq erseqqissaatigalugulu pineqartuni misilittakkat suliamut tunngatillugu isummat, inuttut kinaassuseqarneq, suliamut tunngatillugu sulinermik ingerlatsisinnaaneq, piginnaanngorsarniarluni pikkorissarsimaneq il.il. Taamaattumik Naalakkersuisut qinnuteqartut kikkulluunniit nalilersorneqartarnerat suliffeqarfiutilinnut kikkuugaluartunut aalajangigassaatittuarniarpaat, Ove Karl Berthelsen akissuteqaatimini allappoq.

- Inuit atorfimmut tunngasumik ilinniagaqarsimasuunatik allami ilinniagaqartuullutik ilinniakkaminnut tunngasuunngitsumik suliffeqalersartut ilinniagaqarsimanngitsutut allatulli aningaasarsiaqartinneqartarput. Pineqartumi isumaqatigiissutit aningaasarsiat qanoq qaffasitsiginissaannut aalajangiisuusarput. Suliffeqarfiit pisussaassuseqanngillat ilinniagaqarsimasut. Taamaattumik aningaasaqarnikkut pilerinarsititsinngilaq qinnuteqartut ilinniagaqarsimanngitsut qinnuteqartunit allanit suliamut tunngassuteqanngitsumik ilinniagaqartunit salliutissallugit, nalilersuivoq.

Ove Karl Berthelsen tikkuarpaa ilinniagaqartut najukkaminni ilinniakkaminnut tunngasumik suliffeqalersinnaanngitsut allami atorfinikkunik angalanissamut nuunnissamullu aningaasatigut ikiorserneqarsinnaammata nuttarsinnaanermut tapiissuteqarfimmit.

- Kissaatiginarpoq ilinniagaqartut sumiiffinni ilinniakkaminnik atorfissaqartitsiviusuni suliffissarsiortarnissaat, tamannalu nuttarsinnaanermut tapiissuteqarfiup qulakkiissavaa, Ove Karl Berthelsen oqarpoq.