Kristian Kristoffersen nikorfalluni ooqattaasarnermini tupigusutsitsiinnarpoq
Tjekkiami Nove Mesto-mi sukkalisaarnermi unioqqinngilaq
Kristian Kristoffersen nikuilluni ooqattaasarnermi patajaassutsiminik toraajunerminillu tupigusutsitsivoq. Tjekkiami Nove Mestomi IBU-cup-imi nikorfalluni ooqattaasarnermi unioqqinngilaq. Unammiffik manna nikorfalluni toraajunera 90%-iuvoq. Siorna unammiffik tamaat angutit nunarsuarmi pitsaanersat taamaallaat pingasut nikorfalluni ooqattaasarnermi 90% angaat. Oqartoqarsinnaavoq Kristian nuimasut akornanniilersoq, Biathlon-imi kattuffimmit oqartoqarpoq.
Kristian Nove Mesto-mi pallorluni ooqattaasarnermi marloriarluni uniorpoq. Ujakkaarfimmili Kristian sukkalisaarluarami sukkanermit tyskimit Toni Lang-imit taamaallaat 2,17 minutsinnik kigaanneruvoq.
Ajugaasuuvoq russeq Evgenly Garanichev uniornani ooqattaasartoq. Toni Lang tulliuvoq nikorfalluni ataatsimik uniorami, pingajuattut inissilluni aamma tyskeq Daniel Böhm, nikorfalluni aamma ataatsimik uniortoq. Katinneranni Kristian 89-iuvoq, ajugaasumit 4,05 minutsinnik kigaannerulluni.
Nunatsinnit pitsaanerup tulleraa Øystein Slettemark nr. 100-juulluni, pallorluni ataatsimik nikarfallunilu sisamanik uniortoq. Øystein ujakkaarfimmi 3 sekundinik Kristianimit kigaanneruvoq, ooqattaasarfinnili sukkanerulluni. Pingasunilli amerlanernik uniorneq naleqarluarpoq, katinnerani Kristianimit 33 sekundinik kigaannerulluni.
Inuusuttoq Aqqaluartaa Olsen 20 km-erimi angjusarissaarnini kingulleqqinngilaa, pillaatitulli arfineq pingasoriarluni kaajallaqqilluni, aallartunit 143-nit 123-attut inissinneranut peqqutaaqataalluinnartowq. Ujakkaarnermili Kristian Kristoffersenimit 30 sekundiinnarnik kigaannerunerata ilimannaateqarluartoq takutippaa.
Piitaaraq Skifte ulluni 14-ini sakkortuumik Grønlands Biathlon Forbund-imi sungiusariarluni ooqattaasaatigaluni ujakkaarneq misilerngaarpaa. Piitaaraq igeriarnernit 10-nit pingasut eqqorpai, unammineq siulleq ajorisassaanngitsoq. Piitaararli nerisai ajorsimagunaramik peqqiillioqaaq, unamminermilu pingasoriarluni meriartariaqarluni. Taamaakkaluartoq unammiffik naavaa kingulliup pingajuattut inissilluni.
Tulliani unammissapput Tysklandimi Altenbergimi.
IBU Cup world cup-imit appasinneruvoq, nunarsuarmili pitsaanerpaat ilaat suli tassani unammeqataasarput.