Pisortaaninngortoq tikilluaqqugaat
Søren Hald Møller ataasinngornermi Kommuneqarfik Sermersooq-mi pisortaanertut aallartippoq, borgmesterimit sulisunillu tikilluaqquneqarluni
Kommuneqarfik Sermersooq-mi illoqarfinni tamani sulisut isiginnaarutikkut malinnaapput, ataasinngornermi pisortartaartik Søren Hald Møller tikilluaqqugamikku. Naalagaaffiup sinniisaatut kingullermik atorfeqarpoq, ukiunilu 19-ini Kalaallit Nunaani pisortatut misilittagaqarluni.
Borgmesteri, pisortat sulisullu saaffiginnittarfimmut takersuutsillugit isiginnaarullu piareersartillugu Jim Milne noqartilimmik pattappoq, kommuni nittartakkamini oqaluttuarpoq.
Borgmester Asii Chemnitz Narup-ip Stine Johansern qaammatini arfineq pingasuni pisortaanerugallarsimasoq qutsavigeqqaarpaa, Søren Hald Møllerilu tikilluaqqullugu, nuannaarutiginerarpaalu Kommuneqarfik Sermersooq-mi sulineq sullissinerlu pitsanngorsaqataaffigerusummagit. Borgmesterip nuannaarutigeqaa, atorfimmi nutaami misilitassaqarfiusumi misilittakkani atulissammagit suleqatigalunilu.
Isiginnaarutikkut Ittoqqortoormiinit, Tasiilamit, Ivittuunit Paamiuniillu tikilluaqqusineqarpoq. Oqalugiarnerni sulisut assigiinngitsut imminnut ilisaritipput.
Naggataatigut Søren Hald Møller kalaallisiut qallunaatullu oqalugiarpoq.
- Kommuneqarfik Sermersooq suliffeqarfittut ilisarisimanngilara, ukiunili 25-ni Nuummi innuttaasutut kommuni saaffiginnittarfiusutut ilisimavara, pisortaaninngortoq oqarpoq.
Kommuneqarfik Sermersooq suliffeqarfittut angisuujunera erseqqissaatigaa, innuttaasunut pingaaruteqartorujussuaq, kommunilu innuttaasunik kommunalbestyrelsimillu sullissisussaasoq. Sulisut suleqatigilernissai qilannarisorujussuuaa, kommunip nittartagaani allassimavoq.