Saniatigooralugu piniartut pikkorissut arfernik pisaqartarput
Tunumi saniatigooralugu piniariartartut inuussutissarsiutigalugu piniartutulli arfernik pisaqartigisarput. Taamaattumik pisariaqanngilaq saniatigooralugu piniartut qilalukkanik qaqortanik qernertanillu pisaqarsinnaanerannik arsaassallugit, taamatut isumaqarpoq Harald Bianco.
Inuit Ataqatigiit sinnerlugit Inatsisartuni ilaasortaq Harald Bianco isumaqarpoq Naalakkersuisut qilalukkanik qaqortanik qernertanillu piniarnermut malittarissasanik allannguiniarnerat uniuinerusoq.
Malittarissani anguniarneqarpoq taamaallaat inuussutissarsiutigalugu piniartut siunissami qilalugarniarsinnaanermut akuerineqartarnissaat.
Harald Bianco isumaqarpoq Tunu eqqarsaatigalugu immikkut aaqqissuussisoqartariaqartoq.
- Naak Illoqqortoormiut aamma Tasiilaq piniarnermik inuussuteqarfiugaluartut inuussutissarsiutigalugu piniartutut allagartallit saniatigooralugu piniartartunit ikinneroqaat. Tunu tamaat isigalugu qilalukkat qaqortat qernertallu neqissaqartitsinermi pingaaruteqartorujussuupput, Harald Bianco allappoq paragraf 37 naapertorlugu apeqquteqaateqarnermini.
Uppernarsarsinnaanngikkaluarlugu inuussutissarsiutigalugu piniartutut allagartallit Illoqqortoormiuni ullumikkut tulit aamma 20-t akornanniipput. Aamma taamatut amerlassuseqarput Tasiilami, taamatut IA-p politikeria eqqoriaavoq.
- Siornatigut inuussutissarsiutigalugu piniartuusut nunami allanik nutaanik atorfeqalerput, taamaalilluni piniartutut inuussutissarsiuteqaraluarnertik saniatigooralugu piniartartutut atuutilersillugu, taamaalilluni inuussutissarsiutigalugu piniartut ikiligaluttuinnarlutik, Harald Bianco naqissusiivoq.
Illoqqortoormiuni aasaq qilalukkat pisarineqartut 30-t aamma 40-t akornanniipput, taakkunannga affaat sinnerlugit saniatigooralugu piniartunit pisarineqarlutik. Tasiilami eqqaanilu pisarineqartut quliupput, ilisimaneqarporlu ukioq naatinnagu suli amerlanerusunik pisaqartoqarnissaa.
- Tasiilaq eqqarsaatigalugu, aamma Tunu inuussutissarsiutigalugu piniartoqarneq pillugu aaqqissuusseqqinnermi ilanngunneqassappat, qilalukkat qaqortat qernertallu pisarineqartartut ikittuararsuupput. Tassami piniariartarfiit ungasissumiipput asaaneranilu piniariartarnerit aatsaat pisarput piniartut anginerusunik angallataannik, tassa piniartut taamaallaat angisuunik angallataatillit piniariartarsinnaapput. Inuussutissarsiutigalugulu piniartut angisuunik angallataatillit ikittuinnaapput, aamma inuussutissarsiutigalugu piniartut amerlasuut aasaanerani avannaanut piniariartartut saniatigooralugu piniartut angallataannut ilaasarput. Aaqqissuussineq nutaaq Tunut atuutissappat, taava Tasiilami pisat ullumikkut pisarineqartartut affaat ataaterujussuarlugit amerlassuseqartalissapput. Tamanna maani nammineq neqissaqartitsiniarnermut sunniuteqarnerlorujussuassaaq, Harald Bianco paragraf 37 tunngavigalugu apeqquteqaatimini naqissusiivoq.