Maloqiusamik iliorneq pitsaanngisaannarpoq

- Marloqiusamik iliorneq pitsaanngisaannarpoq, maluginiarparali nunanut allanut ministeriusimasup Per Stig Møllerip ersarissumik tunuartikkaa taamaattoqarsimanngitsoq. Tamanna peqatigalugu innersuussutigisariaqarpara qallunaat silaannaanni CIA-p timmisartuussisarneranik oqarnerit naalakkersuisut 2008-mi iternga tikillugu misissuiffigimmatigit.

Taamatut oqarpoq ministeriuneq Lars Løkke Rasmussen ullaap tungaani sapaatip akunnikkaartumik Christiansborgimi Spejlsalenimi tusagassiortunik katersortitsinermini. CIA pillugu apeqquterpassuaqartoqarnissaa ilimagineqarsimappat tamakkua pakatsipput. Tamannali nassuiaatissaqarpoq. Ministeriuneq siusinnerusukkut oqarsimavoq allakat Wikileaksimi saqqummiunneqartut oqaaseqarfigiumanagit. Tamatuma saniatigut tusagassiortunik katersortitsinermi innersuussutigaa Udenrigspolitisk Nævn, tallimanngorpat ataatsimiittussaq Per Stig Møllerip CIA-mut tunngasunik iliuuseqarnera oqallisigissallugu, tamatuma ilaallutik CIA-p isertortumik timmisartuussisarnermini nutta silaannartaatigoortarnera aammalu Narsarsuarmut Kangerlussuarmullu aqqusaarnertarnerpassui.

Suliassaq qanittukkut pilerpoq USA-p Danmarkimi aallartiterisimasaata James P. Cainip, diplomatitut allagaasa isertuussat takutimmassuk CIA-p timmisartuussisarneri naalakkersuisut nipangiutiinnarusukkaat, Per Stig Møller Folketingimi neriorsuisimagaluartoq iternga tikillugu misissuisoqassasoq, amerikarmiunut isorinnittumik apeqquteqarluni. Cain malillugu qallunaat nunanut allanut ministereqarfianni atorfillit nuimasuut toqqaannartumik oqaluttuussimavaat pisimasoq naalakkersuisut nipangiutiinnarusukkaat. Kinali qanoq oqarpa, Wikileaks-illu allagaatai qanoq uppernartigaat.

Tusagassiortunilli katersortitsinermi ministeriunerup peqataaffigiumanngilaa atorfillit misissuiffigineqarnissaat.

- CIA-p timmisartuussinerinik pisimasut 2008-mi misissorneqarput, Lars Løkke Rasmussen oqarpoq.