CIA’p timmisartuussisarneri soqutigineqannginnerarpai

”Danskit naalakkersuisa uagut ataatsimut isigalugu qulakkeerinivut upperaat annikitsualuttaanut tunngatillugu tatisiniarnissaq pinngitsoorniarpaat, kiisalu nunami namminermi politikkikkut pisut sapinngisamik nipaatsumik iluarsiiffiginiarpaat”.

USA’p Danmarkimi ambassadøria James P. Cain Washingtonimi nunanut allanut naalakkersuisoqarfimmut allappoq, danskit naalakkersuisuisa CIA’p isertortumik unioqqutitsisumillu tigusanik timmisartuussisarnerat pisumik iluarsiiniarnerannut tunngatillugu.

Tamanna allakkani Wikileaksip tamanut saqqummiussaani Poltikenip takusinnaasaani erserpoq.

Ambassadørip nalunaarutini 7. februaari 2008 allappaa, ulloq taanna danskit naalakkersuisuisa illuatungiliuttut arlaannaannulluunniit attuumassuteqanngitsunik, CIA’p danskit silaannartaanni unioqqutitsillutik timmisartuussisarsimagunarneri pillugit, misissuititsinissamik piumasaqaataat pinngitsoortimmassuk.

Tamanna pivoq suleqatigiissitamik pilersitsinikkut pisup iternga tikillugu misissorneqarnissaanik neriorsuinikkut, tamatumunngattaaq ilanngunneqarluni pisumut tunngatillugu amerikami naalakkersuisut aperineqarnissaat.

Allakkani taakkunanissaaq erserpoq, politiit isertortumik paasiniaasartuisa (PET) qularutigilersimannguatsiarmagaat ilumut CIA’p tigusanik angallassisarnertik pillugu, danskit suleqatitit ilisimatissimaneraat. Poltiken søndag taamatut allaaserisaqarpoq.

Tamanna pivoq CIA’p Europami ingerlatsinernut pisortarisimasaa oqaluttuareersoq, CIA 11. septembari 2001-ip kingorna europami iligisatik oqarluttuussimagaat, maannakkumiit USA imminut pissussaafilertoq europami nunani ”apereqqaarnani iliuseqartalernissaminut”.

James Cain, amerikamiut nunanut allanut naalakkersuisoqarfiata imaluunniit udenrigsminister Lene Espersen (K) arlaannaasaluunnit paasissutissat Wikileaksimeersut Politikenip ingerlateqqitai oqaaseqarfigissallugit kissaatigisimanngilaat.

/ritzau/