Lars-Emil nipaanngilaq
Siumup Folketingimi ilaasortaatitaa oqaatsit sakkortuut atorlugit folketingimi apeqquteqariaaseq aammattaaq CIA-p parnaarussanik tigusarisanik angallassisarneranut isertuilluni mianerinninnermut tunngasut naammagittaalliutigai
CIAp Kalaallit Nunaat qulaallugu timmisartuussisarnera Siumup Folketingimi ilaasortaatitaa Lars-Emil Johansen kamattittorujussuuaat. Folketingimi ulloq taanna pinasuartunik apeqquteqaateqarsinnaanermi oqalugiarnermini periarfissaqartilluni arlalitsigut uparuaavoq.
Lars-Emil Johansenip oqalugiarnermini saqqummiussai tamakkiisumik uani saqqummiutissavagut:
- Siullermik erseqqissaatigilara isumaqanngilluinnarmat kalaallit politikkeriisa suli manna tikillugu Københavnimut aallartariaqartarnerat aperiartorlutik Kalaallit Nunaanni susoqarnersoq.
Tassami timmisartut naalagaaffimmit aqunneqartut akuerineqanngitsut isertortumik Danmarkimut nunnissimanngillat - apeqqutaanngilaq sorsunnermi tigusanik anniarfimmukaassanik ilaasoqarsimanersut ilaasoqarsimannginnersulluunnit. Tamanna Kalaallit Nunaanni pivoq.
Taamaattumik maannakkut Kalaallit Nunaannit piumasarisariaqalerpoq nunanut allanut aamma sillimaniarnermut politikkip annertunerusumik akisussaaffeqarfigilernissaa. Taamatut ingerlaannartoqarsinnaanngilaq.
Pissuseq ullutsinnut naleqqutinngilaq.
Soorunami Danmarki suli suleqatigineqassaaq, kisianni kalaallit imminerminnut tunngatillugu nunanut allanut aamma sillimaniarnermut politikkimut tunngasut sunniuteqarfiginerullugit.
Tassami uagut tassa taakkuvugut USAp uagut nunatsinni iliuuserissanut nalorninartorsiortinneqavissut. Danmarkiunngitsoq.
Uagut tassa taakkuvugut timmisartorsuup qaartartorsuarnik atomitalinnik usisup nakkarnerata kingunipiluinik eqqorneqartuusut.
Uagut tassa taakkuvugut sakkutooqarfiit eqqagaannik nakkutigineqanngitsunik napparsimalersut.
Uagut tassa taakkuuvugut tassanngaannaq akiniaanermik eqqugaasussat, timmisartut tigusanik naalliuttitanik ilaasullit uagutsinnut nunnippata.
Uanga isumaqarluinnarpunga amerikap naalakkersuisuisa ajornanngitsinneerasuugaat attaveqaqatigiissutigissallugu, USA sulerinersoq - aammattaaq Kalaallit Nunaanni - danskit naalakkersuisuisa sinnerlutik taamaaliornerannut sanilliullugu.
Taamaattumik uanga isumaqarluinnarpunga, taakku uagullu akornitsinni toqqaannartumik illugiilluta oqaloqatigiinnisarput siunissamut periarfissaasoq.
Qanga pereersut allanngortissinnaanngilavut, kisianni siunissaq piumagutta sunniureqarfigisinnaavarput.
Taamaattumik uanga kajummissaarutiginiarpara Danmarkip aamma Kalaallit Nunaata pimoorullugu oqaloqatigiissutigilertariaqaraat, siunissami Kalaallit Nunaat USA-mik isumaqatigiissuteqartassasoq Danmark ikiortigalugu..
Danskit naalakkersuisuisa kinguleriiaat erseqqivissumik takuttarpaat, suliassaq Kalaallit Nunaannut tunngasoq naammaginartumik naammassineqarnissaa salliutittanngikkitsik. Paasisatilluunniit tunngavigalugit pisariaqartumik kingunerisaannut tunngatillugu iliuuseqarnissartik soqutiginngilluinnartarlugu.
Allarpassuarnut mianerinninnissartik pivallaartarlugu.
Namminersornerunerup eqqunneqarnerata kingunerisaanik pilersinneqarpoq Kalaallit Nunaata akuerisaasunik naalagaaffinnik allanik isumaqatigiinniarsinnaanera, taakku nunatsinni soqutigisaqarpata - pineqartut Kalaallit Nunaannut pissutsinut annertunerusumik tunngassuteqarpata.
Soqutiginartua tassaavoq siunissami qanoq iliorsinnaavugut.
Kiiisalu imaattoqannguatsiarpoq uagut taamaallaat Kalaallit Nunaani susoqarnersoq paasisaqarfigisinnaassallutigu uagut namminneq isumaqatigiissutit isumaqatigiissutigisimagutsigit, soorlu assersuutigalugu amerikamiut sakkutuuisa Kalaallit Nunaanniinnerannut tunngatillugu naleqqussaanerit.
Paasisagut tunngavigalugit taamak ilikkaraqarsimalluta inerniliisinnaavugut - oqallinnermi matumaiinnaanngitsoq - kisianni amerikamiut piffissap ingerlanerani Kalaallit Nunaanni najuussimanerat pillugu, piffissap ingerlanerani Danmarkip oqaluttuanngortissimasaa tamakkerlugu.
Naggataatigut nalunaarutigissavara soorunalimi Siumut illuatungiliuttut aalajangiiffigisassanngorlugu siunnersuutaannut akuersilluni taaseqataassammat.