DR-p politikkimut oqaaseqartartua: Qallunaat soqutiginninngillat
Qularnanngilaq Christiansborgip iluani kisimi CIA-p unioqqutitsilluni tigusanik assartuinera oqaluuserineqartoq. Taamatut naliliivoq DR-p ukiorpassuarni politikkimut oqaaseqartartua Jens Ringbjerg
- Quianaannarpoq, pisimasormi qallunaat politikkersorneranni pingaarutilerujussuusoq, isumaqarpunga qallunaat tamanna oqaluuserinngikkaat, Jens Ringbjerg oqarpoq.
Pisimasup qallunaat folketingimut qinersinissaannut malunniutissanngilaq, Ringbjerg naliliivoq. Peqqissaarnerusumillu misissuinissaq pisariaqassappat illua'tungiliuttullu uppernarsisippassuk qallunaat silaannaatigut tigusanik unioqqutitsilluni assartuisoqartartoq, inuit annerpaamik tupigusuinnassapput.
- Pasisaminnik uppernarsaatitsisoqassaaq, sinnerilu soqutiginnissanngillat, Jens Ringbjerg, ulluinnarni DR-p Christiansborgimi ilanngutassiuisua oqarpoq.
Ministeriunerup ullumi sapaatip akunnikkaartumik tusagassiortunik katersortitsinermini CIA-p unioqqutitsilluni qallunaat silaannaanni tigusanik assartuisarnerani qallunaat marloqiusamik inissisimasimanerat ilumuunnginnerarpaa.
- Innersuussutigiinnarsinnaavara 2008-mi CIA-p unioqqutitsilluni tigusanik assartuisarneranik peqqissaartumik misissuisoqarsimasoq, taamanikkullu nunanut allanut ministerip Per Stig Møllerip erseqqissumik oqaatigaa marloqiusamik iliortoqarsimanngitsoq, Lars Løkke Rasmussen oqarpoq. Ministeriunerup ilanngullugu oqaatigaa amerikarmiut 2008-mi neriorsuisimasut qallunaat oqartussaaffeqarfii qulaallugit tigusanik assartuisoqassappat paasissutissiisassallutik.
- Qallunaat naalakkersuisui ersarissumik neriorsorneqarput tigusanik timmisartuussisoqarsimappat qallunaat naalakkersuisui attaveqarfigineqassasut akulerutsinneqarlutillu, ministeriuneq oqarpoq.
Pisimasoq pillugu nunanut allanut ministeri tallimanngorpat isumasioqatigineqassaaq.