CIA'p timmisartuussinerinit nutaarsiassaqanngilaq

Pingasunngornermi Christiansborgmi akunnerni marlunni apeqqarissaarasuarnermi CIA'p timmisartuussinerit pillugit aalajangiisussanik nutaanik saqqummertoqanngilaq.

CIA'p tigusanik assartuinerini assortuussutaaqisumi timmisartoq imaattoq Gulfstream attuumassuteqarsimavoq. Foto: Gulftstream

- Isumaqatigiinngittoqarnissaa isumaqatigiissutigineqarpoq, nunanut allanut ministeri Lene Espersen (K) isummerpoq.

USA'p Danmarkimi aallartitarisimasaa James P. Cain februar 2008-mi ilisimatitsimmat danskit naalakkersuisui suliami USA-mik ajornartorsiortitsilissanngitsut pillugit WikiLeaks-ip tamanut saqqummiummaguli illuatungiliuttut naalakkersuisunik tinnersaariinnalivissimapput.

Apersuinermi ilaatigut Enhedslistenimit Frank Aaen isorinnippoq, partii malillugu CIA danskit kalaallillu silaannaatigut timmsartukkut 100-t missaariarluni qulaavaasimasoq.

- Naalakkersuisut misissuinisamut tatineqarput, imminnullu misissuiffigalutik, oqarpoq.

Naalakkersuisut USA'p tungaanut suliaq nipangersaatigisimanngikkaa Aaen-ip qularnaarinnikkusuppoq.

Lene Espersen oqaaseqarnermini ilaatigut erseqqissaatigaa, USA nunat tamat akornanni taamaallaat Danmark aamma Tuluit Nunaat kisiisa neriorsorsimagai taakku silaannaat aqqusaarlugit CIA timmisartuussinnginnermini akuersissummik qinnuteqaqqaartassasoq.

Powered by Labrador CMS