CIA-mut tunngasumut marloqiusamik inissisimannginnerarpoq
Danmarkip nunanut allanut ministeriata Wikeleaksimit saqqummiunneqartut parnaarussanik timmisartuussisarnermut tunngasut paasissutissat isortuussat pillugit oqaaseqarusunngilaq.
Danmarkimi naalakkersuisut USA-mut aamma danskinut marloqiusamik inissisimannginnerarpoq.
Taamatut oqarpoq nunanut allanut ministeri Lene Espersen (K) pingasunngornermi pinasuartunik apeqquteqaateqarnermi CIA-p danskit, savalimmiormiut aamma kalaallit silaannartaatigut timmisartuussisarsimaneraanera isertuussaq pillugu.
Lene Espersen Socialdemokraatit oqaaseqartartuat, Mogens Jensen, saassuppaa 80-ikkunni politikkiusoq, Socialdemokraatit Radikalit aamma saamerliuniat peqatigalugit Natomut aamma USA-mut akerliuniarniarnerannik tapersersuisutut.
- Ilumuunngilluinnarpoq naalakkersuisut USA-mik tatisimannginniarsimanerat, Lene Espersen Mogens Jensenimut oqarpoq.
Mogens Jensenip ilumuunngilluinnarnerarpaa uparuartuinaversaartitsilluni pisoqarnerata nalaa oqaluuserisimanagu aamma tapersersorsimanagu, kisianni erseqqissarlugu danskit naalakkersuisui pisumi marloqiusamik ingerlatsisimasut.
- Arlaannik pisoqarsimasinnaavoq, kisianni ilisimanngilarput tamanna pisimanersoq, oqarpoq.
Lene Espersenip naqissuserpaa taamanikkut USA-p nunanut allanut ministeria Condoleeza Rice 2008-mi neriorsuimmat USA danskinut akuersissummik noqqaassuteqarumaartoq CIA siunissami danskit silaannaatigut timmisartuussisassaguni. Danskit naalakkersuisuisa kissaatigisimasinnaagaluarpaat amerikarmiut timmisartuussisarsimannginnerisa qulakkeernissaat.
Nunanit 61-iusunit 17-it parnaarussanik timmisartuussisarneq misissuiffigisimavaat, taakkunannga Europami nunat 16-it. Nunani arlalinni naalakkersuisut Danmarkimisullu misissuisitsisimapput, allalli parlamentitit (inatsisartutik, nuts.) aqqutigalugit misissuisitsisimallutik, Lene Espersen nassuiaavoq.
Lene Espersenip paasissutissat isertuussat, nittartakkami VikeLeaksimi saqqummiunneqartut, ungasinngitsukkut 7. februaarimiit 2008-mi USAp taamanikkut Danmarkimi ambassadøriata James P. Cainip nalunaarusiaanut tunngasut, naalakkersuisooqatigiit VK-kkut CIAp parnaarussanik timmisartuussisarneranut tunngatillugu USA-mik ajornartorsiortitsiniannginnerat, oqaaseqarfigerusunngilaa.
Lene Espersenip naqissuserpaa "USA Buship aamma Obamap præsidentiunerisa nalaanni aalajangersimalluinnartumik politikkeqarnerat, timmisartuussisarsimanerit ilumut pisimanersut ilumoornersut imaluunniit ilumuunnginnersut uppernarsarnissaannut tunngasoq".