Danmarkimi imatut inuuneqassaatit

Aalborgimi kalaallit inuusuttut angerlarsimaffimmit ungaseqisumi qanoq iliorlutik ilinnialersinnaanerminnut imaluunniit atorfeqalersinnaanerminnut pitsaasumik siunnersorneqarput.

Tulleriiaarneq aalajangersimasuunngitsoq tunngavigalugu: Karl, Malu, Benjamin, Petrine Nuummeersut, Susanne aamma Nanna Maniitsumeersut, Vilma aamma Inga Paamiuneersut, Rene Sisimiuniit aamma Rene Qaqortumeersoq, tamarmik soqutiginnillutik tusarnaarput kalaaliulluni Danmarkimi qanoq inuuneqartoqarsinnaanera pillugu.

Ulluni makkunani Aalborgimi suliffissarsiuussisarfik aaqqissuussivoq kalaallinut inuusuttunut aqqanilinnut, 18-iniit 31-t tungaannut ukiulinnut inuusuttut taakku ilinnialernissaannut imaluunniit sulilernissaannut kajumissaarinissaq siunertaralugu.

Pingasunngormat inuusuttut pulaarneqarput kalaallimit namminermisulli ukioqapajaarluni Danmarkimut pisoq, Danmarkimi ilinnialerpoq kingornatigullu atorfittaarluni.

Inuusuttut Aalborgimi ukiuni ataatsimiit qulit tungaannut najugaqartuupput, suliniummilu matumani neriuutigineqarpoq inuunerminni ingerlaqqinnissaannut ikiueqataanissaq, Danmarkimi ilinniartitaanermi, suliffeqarnermi pissutsini aamma ilanngullugit kattuffeqarnermi A-kasseqarnermilu periarfissaannik saqqummiivigineqarlutik.

Inuusuttut kalaallit Aalborgimut nuupput ilaqutariinnermi pissutsit pissutigalugit, ilinniagaqalernissamik kissaateqarneq, meeqqamik pitsaanerusumik atuartinneqarnissaat siunertaralugu, ataaserlu kisiartatuaalluni siunertaqarani Aalborgiliarsimalluni. Aalborg arlalinnit toqqarneqarsimavoq ilinniartitaanikkut aamma suliffissaqarnikkut periarfissagissaarnera pissutigalugu.

Aammattaaq qitornalinnit arlalinnit Aalborg toqqarneqarsimavoq peqqinnissaqarfigissaarnerunera pissutigalugu.

Powered by Labrador CMS