Naappaassuarmik kræftimik napparsimasut nikallungasarput annilaangallutillu
Naappaassuarmik kræftimik napparsimasut taakkulu qanigisaat nikallunganermik nappaateqalernermik aamma annilaangalersanermik atugaqalernissamut qaninneerarsuupput, misissuinermi paasineqarpoq
Nappaarsuarmik kræftetimik napparsimasut tallimassaat nakorsagassanngorluni nikallunganermik nappaateqalersarpoq kiisalu nappaarsuarmik kræftetimik napparsimasut pingajussaat imaluunniit sisamassaat annilaangasunngortarput imaluunniit nikallungasunngorlutik. Atuagassiami ataqqineqartumi The Lancet Oncology-mi saqqummersinneqaqqamersumi misissuinerup tamanna ersersippaa.
- Nakorsat, peqqissaasut aamma nammineq nakorsarisap annertunerujussuarmi eqqumaffiginiartariaqarpaat napparsimasup aamma taassuma ilaqutaasa nikallunganermik nappaateqalersinnaanerat, professor Christoffer Johansen, cancer.dk-mut oqarpoq.
Nikallunganermik nappaateqalersimasunik misissuinerup paasinarsisippaa, nikallunganermik naappaateqalersimasut 40 procentingajaasa imminnut toqunnissartik eqqarsaatigisarsimagaat.
Lancets Oncology-mi misissuinermi napparsimasut 15.000-it tunngavigineqartut nappaassuarmik kræftimik napparsimanerminnik toqquteqarsimasuunngitsuupput aamma napparsimasut peqqissisinnaajunnaarsimasuullutik.
- Misissuinerup qularnaarpaa nappaassuarmik kræftimik napparsimalluni paasitinneqarnerup kingorna ukiut tallimat tikillugu nakorsartariaqartumik nikallunganermik nappaateqalersinnaanermut suli nalorninartorsiortoqartartoq, professor Christoffer Johansen, Kræftens Bekæmpelse-meersoq, misissuinermi peqataalluni allaaserinneqataasoq.
Misissuinerit allat paasinarsisippaat nappaassuarmik kræftimik napparsimalersimasut paasitinneqarnermik kingorna ukiumi siullermi, nikallunganermik nappaateqarnertik pissutigalugu allanut naleqqiussilluni napparsimavimmut unitsinneqarnissaat marloriaammik qaninnerusartoq. Aammattaaq ilaqutaasut kiisalu iviangimikkut nappaassuarmik kræftimik nappaateqalersimasut aapparisaat perulullutik tanimikkut napparsimalersinnaanerat 40 procentimik annertusisartoq, arnaq iviangimigut nappaassuarmik kræftimik nappaateqalersimasoq paasineqarsimagaangat.