Aatsitassat pillugit isumasioqatigiinneq peqataffigineqarluarpoq
Inuit 150-it suliffeqarfinnit assigiinngitsunit 69-init aggersut Aatsitassanut Ikummatissanullu Naalakkersuisoqarfiup isumasioqatigiissitsinermut aaqqissuussaanut peqataapput.
Ukiuni aggersuni aatsitassarsiorneq kalaallit aningaasaqarnerata annertusiartornissaanut malunnaateqarluartumik ilassuteqarnissaa naatsorsuutigineqarpoq.
- Naalakkersuisut anguniagaasa ilagaat aatsitassarsiorneq ikummatissarsiornerlu inuussutissarsiutitut piujuartussatut pingaarnertut ineriartortinneqarnissaat. Inuussutissarsiutit taakkua inerisarneqassapput imminnut akilersinnaasunik illersorneqarsinnaasunillu aamma sapinngisamik nunatsinni suliffeqarfiit sulisartullu nunatsinniittut annertunerpaamik akuutinneqarnerisigut. Aatsitassanut inatsimmi piumasaqaatit annersaasa ilagaat suliffeqarfiit nunaqavissunik sulisoqarnissaat kiisalu nunatsinni suliffeqarfiit peqataatinneqarnissaat, taakku piumasaqaatinik naammassinnissinnaappata, Aatsitassarsiornermut Naalakkersuisoq Ove Karl Berthelsen isumasioqatigiinnermut atatillugu, nanoq.gl-imut oqarpoq .
Isumasioqatigiinnermi suliffeqarfiit assigiinngitsut pilersaarutitik pillugit saqqummiussipput. Suliffeqarfiit suliassaqarfinni makkunani isumaqatigiissuteqarsinnaapput: qillerineq, asimi nagugaqarfiit, nerisassaqartitsineq, assartuinissamik pilersaarusiorneq, angallatinik aamma timmisartunik attartortitsineq aammattaaq inatsisitigut aamma aningaasaqarnermi siunnersuineq il.il.