Issittoq pillugu ataatsimeersuarnermi peqataassanngillat
Issittoq pillugu Tromsømi ataatsimeersuarnissami norskit aaqqissuussisut pakatsissutigaat Danmark Kalaallit Nunaallu politikkikkut peqataatitaqannginnerat. Isorinninneq qallunaat ministeriannit tunuartinneqarpoq.
Norgep avannaani illoqarfimmi Tromsømi issittoq pillugu ataatsimeersuarneq Arctic Tipping Points sapaatiuppat ammarpat aaqqissuussisut, ingerlatsivup Arctic Frontiers-ip, tupigusuutigaa qallunaat kalaallillu peqataatitaqannginnerat, taamatut allappoq Ritzau.
- Ataatsimeersuarneq siunissamut sannavittut ingerlanneqassaaq. Tassani silap pissusianik ilisimatuut suliaminni angusanik nutaanerpaanik saqqummiussissapput, tamatumuunakkullu aalajangiisartut siusissukkut peqataanissaminnut periarfissinneqassapput, Arctc Frontiersimi allattoqarfimmi pisortaq Reinhold Fieler oqarpoq.
Taanna oqarpoq qallunaat politikerii ukiut tamaasa qaaqquneqartartut, takkutinngisaannarlutilli. Ataatsimeersuarneq tallimassaa ingerlanneqassaaq, ukioq mannalu tamanna pissaaq Nansen-Amundsenip ukiuat suleqatigalugu.
- Ajuusaarutigisorujussuuvarput Danmark Kalaallit Nunaallu ataatsimeersuarnermik, nunanit arlalinnit Issittumi pisuussutinik silallu pissusiata allanngoriartorneranik soqutigisalinnit peqataaffigineqartussamik, soqutiginninngimmata, Reinhold Fieler oqarpoq.
- Ataatsimeersuarneq ingerlanneqassaaq siunissamut sannavittut. Tassani silap pissusianik ilisimatuut suliaminnik angusatik nutaajunerpaat saqqummiutissavaat, tamatumuunakkullu aalajangiisartut siusissukkut peqataanissaminnut periarfissinneqassapput, Arctic Frontiers-imi allattoqarfimmi pisortaq Reinhold Fieler oqarpoq.
Silap pissusianut ministerip Lykke Friisip (V) norskit isorinninnerat paasisinnaannginnerarpaa oqarlunilu Issittumi ineriartornermut Danmarkip peqataannginneranik oqarneq piviusorpalaanngitsoq.
- Erseqqissarlara Danmarki issittumi apeqqutinut tunniusimasorujussuummat. Nunat tamalaat silap pissusianik isumaqatigiinniarneranni aammalu ilisimatusarnermi nammineri, Lykke Friis oqarpoq.
Ilisimatusaatit kingulliit paasiniarlugit taanna ilaatigut sapaatip akunnera ataaseq Tunup avannaani qallunaat ilisimatusarfianni Zackenbergimiissimavoq.
– Taamaattumik peqataasinnaannginnera takussutissaanngilaq isumaqartunga ataatsimeersuarnissaq pisariaqanngitsoq. Qallunaat naalakkersuisui ataatsimeersuarnermik taamaattumik ukiup ataatsip matuma siornatigut Kalaallit Nunaanni ingerlanneqartumi aaqqissueqataasimavoq, silap pissusianut ministeri nassuiaavoq.
Lyke Friisip ilanngullugu oqaatigaa qallunaat EU-mi siulittaasuunissaanni Issittoq pingaartinneqassasoq. Silap pissusianut ministeri oqarpoq sunut tamanut peqataanissaminut piffissaqarani.
Aamma Kalaallit Nunaannit peqataasoqassanngilaq. Naalakkersuisut siulittaasut Kuupik Kleist, nunatsinni ilinniartitaanermut naalakkersuisoq Mimi Karlsen aammalu inuussutissarsiornermut aatsitassanullu naalakkersuisoq Ove Karl Berthelsen tamarmik qaaqquneqarsimapput, peqataasinnaanatilli.
Naalakkersuisunut ilaasortat Ilulissani ilinniagaqarneq pillugu ataatsimeersuarnissami peqataassapput. Ataatsimeersuarnissaq tamanna Kalaallit Nunaannut pingaarutilerujussuartut taaneqarmat Ove Karl Berthelsen Norgemi peqataasinnaanani ajoraluartumik nalunaartariaqarsimavoq, naalakkersuisup allaffia paasissutissiivoq.
Fielerip neriuutigisimagaluarpaa kalaallit Tromsømi Kalaallit Nunaata aatsitassanut periusianik nassuiaassasut, misissuinerit takutissimammassuk sermersuup ataani nunarsuarmi grundstoffit qaqutigoornersaannik annertuumik peqartoq.
Tusagassiorfiit 37-it Arctic Frontiersimut qaaqquneqarsimapput, taakkunannga 17-it norskit, qallunaanilli pinnani.