Klovni Miki Brugsenip nersornaataanik nersornaaserneqarpoq

Brugseni nersornaammik nutaamik pilersitsivoq 100.000 koruuninik aningaasartalimmik. Dronning Ingridip Napparsimmavissuani klovni Miki aningaasarpassuarnik tigusisut siullersaraat

Klovni Miki Brugsenip nersornaasiuttagaanik nersornaaserneqarpoq. Saamerliuvoq Brugsenip pisortaa Olav Thomsen talerperlerlu Brugsenip siulittaasua Ole Mølgaard-Motfeldt. Ass.: Benny Kokholm

Kalaalit Nunaanni Brugseni-mi siulittaasup Ole Mølgaard-Motzfeldtip ullaap tungaani Ukioq manna Nersornaat Nuummi Dronning Ingridip Napparsimmavissuani Klovnimut Mikimut tunniuppaa.

Nersornaat 100.000 koruuninik aningaasartaqarpoq.

Nersornaatip tunniunneqarnera tunngavilersorpaa Miki piumassutsiminik Dronning Ingridip Napparsimmavissualiartartoq meeqqat sineriammeersut aliikkusersoriartorlugit. Klovni illaqatigisarpaat toqqissisimallutilu. Isumaqarpugut assigiinngissuteqartoq klovnip meeqqat sannginnerpaagaangata nuannaartittarmagit. Isumalluartilertarpai toqqissisimatillugillu, Ole Mølgaard-Motzfeldt oqarpoq.

Klovni Miki tassaavoq Vivi Wennerfeldt. Taassuma ilaanni Nuuk Ugeavisimi annonci takusimavaa, tassani Dronning Ingridip Napparsimmavissua klovnimi ujaasisoq, tamannalu pileritsaappaa ullumikkullu napparsimmavimmi meeqqat annertuumik sullittarpai.

KNB-p nersornaataanut 17-inik inassuteqartoqarsimavoq. Inassutigineqartut tamarmik piukkunnarsimapput, taamaattumik siulersulisunut ajornakusoorsimavoq tigusisussaq eqqortoq toqqassallugu, siulittaasoq oqarpoq.

Brugsenip siullermeersumik nersornaat tunniuppaa.

Nersornaat tunniunneqartassaaq kattuffimmut, peqatigiiffimmsut inuinnarmulluunniit, suliniuteqarnermigut assigiinngisitsisumut.

Assersuutigalugu nersornaat isumaginninnermik suliniutinut, ikiuiniarnermik sulisunut, timersornerup iluani piumassutsiminnik sulisunut imaluunniit nassaamut inuussutissarsiutitigulluunniit suliniummut. Kattuffimmut ingerlatsivimmulluunniit tunniunneqarsinnaavoq. Aamma inunnut ataasiakkaanut tunniunneqarsinnaavoq, maligassuisumut imaluunniit inuunini naallugu sulimiuteqarsimasumut, KNB paasissutissiivoq.

Ukiumoortumik nersornaatip ilisaritinneqarneranut atatillugu KNB -p siulittaasua oqarpoq Brugsen nersornaammik pilersitsinissamik aalajangersimasoq pissutigalugu kalaallinut inuiaqtigiinnut ilaagami suliniutinullu nutaanut akisussaaqataarusukkami.

Powered by Labrador CMS