Timmisartortartunik isumaqatigiinniarnermi aaqqiagiinnermut ulloq pingaartoq
Timmisartortartut aamma Air Greenlandip isumaqatigiinniartui arfininngornerup tungaanut eqqarsartinneqarput. Kattuffimmi allattuuneq inernissaanut isumalluanngilaq
Air Greenlandip aamma timmisartortartut kattuffiata LO-p ataani kattuffiup Serviceforbundip isumaqatigiinniarnerat malunnartumik nikeriarsimanngilaq.
Ataasinngorpat timmisartussaguit taava isumassatsialaassaaq unnuvissarsioreernissat tassami timmisartortartunik aamma timmisartumik saqisunik mattussinermut tunngasoq suli nalorninartoqarpoq.
Ullumi tallimanngornermi ataatsimiinnissaq taamaatiinnarneqarpoq, illuatungeriit sisamanngormat kingusissukkut Københavnimi Isumaqatigiissitsiniartarfimmit angerlatitaareersut.
Toni Vagn Rytkønen, Serviceforbundimi allattuuneq sermitsiaq.ag-imut ilisimatitsivoq illuatungeriit angerlartinneqarsimasut piumasaqaatitik tunuliaqutatillu oqaloqatigiissutiginiassammatigit.
Tonni Vagn Rytkønen siusinnerusukkut oqaaseqareerpoq illuatungeriit isumaqatigiissinnaanerannut tunngatillugu nammineq isumalluaateqarnani.
Ulluni kingullerni isumaqatigiinniarnerit isumallualersinnaanerup akerlianik pisoqarpoq.
- Pissutsit allangunngillat. Illuatungeriit assorsuaq imminnut ungasipput, Tonni Vagn Rytkønen oqarpoq.
Isumaqatigiinniarneri Københavnimi Isumaqatigiissitsiniartarfimmi arfininngorpat nal. 07.00 Kalaallit Nunaanni nalunaaqutaq malillugu aallarteqqissapput. Taamaattumik arfininngorneq ulloq pingaaruteqarpoq.
Timmisartortartut aamma Air Greenlandip piumasaqaatiminnik nikeriarnianngippata isumaqatigiissitsiniartartut siulittaasuata, højesteretsdommer Asbjørn Jensenip mattussinissaq ullunik 14-inik kinguartissinnaavaa. Asbjørn Jensen taamatut iliorniarnani aalajangerpat taava mattussinissaq piviusunngussaaq sapaat 9. januaari.
Ullorli taana ilaasunik timmisartuusisoqassanngilaq ataasinngornikkulli. Taamaappat ilaasussat 1.195-it mattussinerup ulluani siullermi eqqorneqariissapput, taakkunannga ilaasussat Danmarkiliartussat 385 marloriarluni aallatoqartussaammat.
Air Greenland novembarimili suliffeqarfiup timmisartortartui aamma timmisartuni saqisui mattunniarlugit ilimasaarpai taamanikkulli timmisartortartut isumaqatigiissutaat pillugu isumaqatigiinniarnerit ajalusoormata.
Tassa maannakkut Asbjørn Jensen, Serviceforbundimi siulittaasumut allatsitut Air Greenlandip aamma kattuffiup Serviceforbundip akornanni aappassaaneerluni isumaqatigiissitsiniarpoq. Siullermi 2009-miuvoq, taamani timmisartuni saqisunut atugassarititaasut isumaqatigiinngissutaapput.
Taamanikkut Asbjørn Jensen illuatungeriit taakku akornanni isumaqatigiissitsiniarnerminik iluatsitsinngitsoorpoq, kingusinnerusukkulli iluminni isumaqatigiissuteqarput.